Ish-kryetari i PD, Lulzim Basha, ka reaguar për herë të parë për situatën në Partine Demokratike dhe zgjedhjet lokale të 14 majit.
Një vit pasi është larguar nga drejtimi i PD, Basha ka akuzuar Sali Berishën si përgjegjës për daljen e demokratëve me dy kandidatë.
LULZIM BASHA
ISH-KRYETAR I PD
“ Përgjegjës është ai që ka përçarë PD. “
Komentet e Bashës për gazetarët kanë qenë të shkurtra, por ai ka konfirmuar se do të jetë aktiv në politikë e do të jetë pjesë e fushatës elektorale.
“Nuk kam më asnjë koment tjetër për sot. Patjetër që do të jem pjesë e fushatës në të gjithë Shqipërinë”
Basha replikoi në distancë edhe me Sali Berishën, i cili i kërkoi të tregojë burimin e parave me të cilat është paguar firma amerikane e lobimit.
Edhe pse sipas gjykatës, Lulzim Basha është kryetar i Partisë Demokratike, vetë Basha prej 21 marsit të vitit të kaluar, kur dha dorëheqjen, është tërhequr nga politika aktive. Basha nuk ka zhvilluar asnjë takim publik me strukturat e Partisë dhe në parlament vjen vetëm në seanca të veçanta, siç ishte sot ajo për nder të presidentit austriak.
