Përmes “Fondit për komunitetin” 50 pallate në bashkinë e Tiranës i janë nënshtruar rikonstruksionit për ndryshimin e fasadave.
Këtë herë përfitues janë banorët e një prej pallateve të rrugës “Thanas Ziko” për të cilin kryebashkiaku Erion Veliaj u shpreh se nisi si një punë vullnetare për të bashkuar te ardhurat monetare dhe rezultoi me sukses.
Erion Veliaj: “Ne e nisëm si eksperiment për të pare a do të bëheshin dot shqiptarët në një mëndje që të vinin gjysmën e lekëve ata dhe gjysmën e lekëve bashkia, për tu siguruar që të bëhet një investim i plotë dhe pastaj na doli një nga eksperimentet më të suksesshme.”
Veliaj shtoi se për çdo grup banorësh që vjen me një propozim së bashku me administratorin për të ndryshuar fasadën e pallatit, do të ketë shtim buxheti.
Erion Veliaj: “Sot një tjetër pallat i shtohet buqetës së pallateve që transformohen sot në Tiranë. Nëse gjejmë dakordësi që të bëhen bashkë me administratorin dhe të vijnë më një propozim për ndryshimin e pallatit, ne do ta shumëfishjojmë buxhetin për komunitetin në mandatin e dytë, për tu siguruar se çdo grup banorësh shpërblehet sepse kanë vendosur mendjet, zemrat dhe financat bashkë.”
Nga projekti i fondit për komunitetin përfitojnë vetëm ata banorë që kanë zgjedhur e certifikuar administratorin tyre.