Ndajeni këtë artikull me të tjerë duke klikuar ikonat më poshtë

Tiranë. Faiku zgjohet herët dhe del nga shtëpia rreth orës 6 të mëngjesit. Është një ritual që e kryen prej dekadash. Shkon në punishten e tij dhe nis punën në rregullimin e pajisjesve elektro-shtëpiake. Punën e ka nisur në moshën 14 vjeçe, ndërsa sot është 64 vjeçar.

“Punoj që në moshën 14-vjeçare. E nisa në Fabrikën e Qelqit në Kombinatin Tekstil. Pra që nga ajo kohë, kam gjysmë shekulli që punoj. Punova 9 vjet në fabrikë dhe arrita kategorinë e 7 Mjeshtër. Pastaj punova rreth 9 vjet në tregun e fruta-perimeve, bashkë me gruan, deri në vitet ’90. Erdhi demokracia dhe punojmë privat. Shkollën e mesme dhe të lartën si inxhinier Elektrik, i kam bërë natën, pasi edhe punoja edhe studioja. Si inxhinier nuk punova dot asnjë ditë, pasi nuk iu përgjigja thirrjes së partisë, që të shkoja në hidrocentralin e Komanit.”-tregoi ustai.

Ai tregon se nuk ka dëshirë të dalë në pension, pasi puna e ustait në Shqipëri nuk vlerësohet. Fatmirësisht Faiku gëzon shëndet dhe ka ndërmend të punojë.

“Nuk kam ndërmend të dal në pension. Unë pension nuk pres prej këtyre, se këta 200 mijë lekë pension të japin. Unë shyqyr që kam krahët dhe gëzoj shëndet të mire, që i nxjerr 5 lekë vetë. Po të më marrësh tani e të më thuash që do të jap pension 500 mijë lekë në muaj dhe mos puno më, unë nuk e pranoj. Zëre se mua më ke pushkatuar. Dal që në orën 6 nga shtëpia. Në Shqipëri puna e ustait nuk paguhet siç duhet. Unë kam punuar edhe jashtë, kam punuar 6 muaj në Gjermani me vizë pune.

Të  betohem, që e lashë gojëhapur gjermanin dhe gjermani mua më la gojëhapur. Më paguante shumë mirë, lekë sa të duash. Merrja të paktën 200 euro në ditë. U ktheva, se kisha fëmijët. Nuk rrihet jashtë pa familjen, është e pamundur. 40 vjeç të isha tani, e di unë se çfarë bëja. Do ikja me vrap në Gjermani. Të rinjtë për mua, të ikin një orë e më parë, se këtu nuk kanë perspektivë. Shteti nuk të ndihmon. Hap një biznes, ai nuk të jep një dorë. Bota jashtë të mban 6 muaj në provë, pa licencë, nuk paguan detyrime.  Nuk dha rezultat, s’mban asnjë tatim. Kurse këta nuk të japin asnjë lloj stimuli.”-tregoi Faiku në një intervistë për Top Channel.

Ndajeni këtë artikull me të tjerë duke klikuar ikonat më poshtë