Konsullata gjermane në Stamboll do të mbyllet sot për shkak të një kërcënimi për një sulm të mundshëm, në qytetin më të madh të Turqisë, njoftoi Ministria e Jashtme gjermane.
Gjermania paralajmëroi qytetarët e saj në Stamboll se rreziku i sulmit ishte kryesisht i lartë në lagjen qendrore të Beyoglu dhe rreth sheshit “Taksim”.
Ministria tha se masa për mbylljen e konsullatës u bë pas vlerësimit të autoriteteve të sigurisë, ndërsa u bëri thirrje qytetarëve që të jenë vigjilentë dhe të shmangin turmat.
Gjermania, Suedia, Norvegjia dhe Danimarka, si dhe SHBA-ja, kanë paralajmëruar tashmë shtetasit e tyre për një rrezik në rritje të sulmit në Turqi.
Turqia, nga ana tjetër, paralajmëroi qytetarët e saj për sulme në Evropë dhe Shtetet e Bashkuara të Amerikës.
Tensionet midis Turqisë dhe disa vendeve evropiane janë ndezur për shkak të protestave që Ankaraja i konsideron islamofobike ose antiturke.