Agjencia e motit në Japoni e shpalli valën e të nxehtit që ka përfshirë vendin një katastrofë natyrore, me të paktën 65 vdekje të raportuara gjatë javës së kaluar.
Një zëdhënës i agjencisë paralajmëroi se “nivele të paprecedenta të të nxehtit” raportohen në disa zona.
Më shumë se 22 mijë njerëz janë shtruar në spitale me goditje nga dielli, gati gjysma e tyre të moshuar, thonë zyrtarët e emergjencave.
Vala e të nxehtit nuk po shfaq shenja se do të ulet shpejt, thonë parashikuesit e motit.
Të hënën, në qytetin Kumagaya u raportuan temperatura prej 41.1 gradë celsius, më e larta e regjistruar ndonjëherë në Japoni.
Në qendër të Tokios, temperaturat mbi 40 gradë po ashtu janë regjistruar për herë të parë.