Ish-deputetja demokrate, Rudina Hajdari ka komentuar luftën e brendshme që po zhvillohet në PD, pas përjashtimit të Sali Berishës.
Nga SHBA, në një lidhje direkte për “Zona Zero” në Top News, Hajdari tha se aktualisht në selinë blu po zhvillohet një garë “mes pronarëve”, për interesa personale.
“Kemi të bëjmë me një garë muskujsh, mes pronarëve të partisë. Njëri ish-pronar dhe tjetri pronar. Nuk shoh ndonjë mundësi hapjeje të PD-së”, tha Rudina Hajdari.
Sipas ish-deputetes, Sali Berisha reagoi vetëm pasi iu cënua interesi personal. Sido që të shkojë “lufta” në PD, Hajdari la të kuptohet se nuk beson se ish-kryeministri mund të fitojë sërish besimin e qytetarëve.
Situata në PD?
Ajo që ndodh në PD, e kemi parë dhe tejparë. Kemi të bëjmë me një garë muskujsh, mes pronarëve të partisë. Njëri ish-pronar dhe tjetri pronar. Nuk shoh ndonjë mundësi hapjeje të PD-së. Unë kam qenë kritike nga Lulzim Bashës.
Vendimi i tij për t’u larguar nga parlamenti ishte një vendim antiamerikan. Asnjë nuk iu përgjigj thirrjeve të ndërkombëtarëve, që ishin kundër kësaj lëvizje. As ish-kryetari, Sali Berisha nuk i kritikoi këto vendime që sollen pasoja të rënda për PD.
PD humbi bazën, humbi pushtet. Ne po vuajmë pasojat e vendimeve të Bashës. Sali Berisha e ka patur PD-në si pronë dhe kërkon që ta rimarrë.
Berisha ka marrë vendime po aq autokratike. Berisha foli vetëm tani në fund, pasi gjatë kësaj kohe nuk e ka ngritur zërin për moszbatim statuti apo lidhur me vendime të tjera të Lulzim Bashës.
Foltorja e Berishës
Sali Berisha duhet t’i kishte ngritur shumë më parë këto çështje. Ai po reagon tani, vetëm pasi iu cënua interesi personal. Berisha ka bërë të njëjtat gabime që ka bërë Basha.
Nuk mendoj se Berisha mund të fitojë përtej strukturave të PD-së. Në fund të fundit në presim ndërrimin e pushtetit, por kjo nuk po ndodh.
Duhet një ndryshim më thelbësor brenda opozitës, që të mos lidhet me individët, por me vlerat demokratike të PD-së.
A do rikthehet Rudina Hajdari për të marrë PD-në?
Kjo nuk është në dorën time. Kjo bëhet duke hapur partinë.
