Autoritetet ruse në Krimenë e aneksuar, kanë thënë se e kanë zmbrapsur një sulm ukrainas me dron, në qytetin e Sevastopolit.
Krimeja është gadishull ukrainas, që është aneksuar nga Rusia më 2014.
Ky është vetëm një prej sulmeve të supozuara ukrainase me dronë, dhe tentimeve të sabotazhit, para festimeve të 9 majit.
Në këtë ditë, Rusia shënon fitoren e forcave sovjetike ndaj nazistëve, në Luftën e Dytë Botërore.
Në Sevastopol, ku gjendet flota ruse, guvernatori Mikhail Razvozhayev, ka thënë se përgjatë natës janë nisur shumë sulme me dronë.
“Mbrojtja kundër-ajrore dhe njësitet për mbrojtje, kanë zmbrapsur një sulm të ri”, në qytet, ka thënë ai të dielën.
Sipas tij, Ukraina i ka nisur më shumë se 10 dronë në qytet, duke shtuar se dy janë rrëzuar mbi det, dhe të tjerë e kanë humbur kontrollin.
“Nuk është dëmtuar infrastruktura e qytetit”, ka thënë ai.
Raportimet për këto sulme vijnë teksa lufta e Rusisë në Ukrainë hyn në muajin e 15-të.
Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./rel
