Izraeli ka shpenzuar rreth 42 miliardë dollarë për luftën në Rripin e Gazës, një mesatare prej 83.8 milionë dollarë në ditë.
Gazeta izraelite Yedioth Ahronoth raportoi se nga mesi i janarit lufta kishte kushtuar 150 miliardë shekelë (pothuajse 42 miliardë dollarë), duke cituar Gil Pinchas, këshilltar ekonomik i shefit të Shtabit të Ushtrisë izraelite dhe kreut të Komitetit të Buxhetit në Ministrinë e Mbrojtjes, raporton Anadolu.
I njëjti burim thotë se kostot mesatare ditore të Izraelit për luftën në Gaza arritën në pothuajse 300 milionë shekelë (83.8 milionë dollarë).
Gjithashtu u tha se një natë e mbrojtjes së qiellit izraelit, me ndihmën e një koalicioni ndërkombëtar, nga një sulm raketor iranian kushtoi një miliard shekelë (279 milionë dollarë).
Më 1 tetor të vitit të kaluar, Irani lëshoi rreth 180 raketa balistike në Izrael, në atë që Teherani tha se ishte hakmarrje për vrasjet e mëparshme të liderëve të Hezbollahut dhe Hamasit dhe komandantit të Gardës Revolucionare.
Yedioth Ahronoth raporton se zëri më i madh i shpenzimeve në buxhetin e mbrojtjes të Izraelit ishte financimi për ushtrinë rezervë, e cila arriti në 45 miliardë shekelë (12.5 miliardë dollarë).
Më shumë se 47,000 palestinezë të vrarë
Marrëveshja e armëpushimit dhe shkëmbimit të të burgosurve midis Hamasit dhe Izraelit hyri në fuqi më 19 janar. Faza e parë zgjat 42 ditë, gjatë së cilës do të vazhdojnë negociatat për fazat e ardhshme të marrëveshjes. Marrëveshja është ndërmjetësuar nga Egjipti dhe Katari, me mbështetjen e SHBA-së.
Izraeli ka vrarë më shumë se 47, 400 palestinezë, kryesisht gra dhe fëmijë, dhe ka plagosur më shumë se 111,000 në luftën në Gaza që nga 7 tetori 2023.
Mbi 11,000 njerëz të tjerë janë të zhdukur në Gaza dhe infrastruktura e enklavës është shkatërruar. Rripi i Gazës është bërë skena e një prej fatkeqësive më të rënda humanitare globale.
Gjykata Ndërkombëtare Penale lëshoi urdhra arresti në nëntor të vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë. /tesheshi.com/
