Deputeti i zgjedhur i Partisë Demokratike, Ervin Salianji thotë se PD ka mbajtur qëndrim parimor lidhur me shpalljen “non grata” të ish-kryeministrit Sali Berisha. Gjatë një interviste për Euronews Albania, ai tha se “partneriteti me SHBA” është “prioritet absolut për PD”.
I pyetur lidhur me takimin e mbajtur mes zv. ndihmës Sekretarit të DASH, Philip Reeker dhe Lulzim Bashës ku zyrtari amerikan është shprehur se qëllimi i vizitës është lufta kundër korrupsionit por edhe përcaktimet “non grata” nga ana e SHBA dhe nëse ka pasur kërkesë për të përjashtuar Berisha nga grupi i PD.
“Qëndrimi i PD, është një qëndrim i qartë. Partneriteti strategjik me SHBA dhe thellimi i këtij partneriteti është prioritet absolut i PD dhe takimi i djeshëm pa diskutim që të tregon dhe vëmendjen e SHBA ndaj PD dhe si një nga partnerët më të besueshëm të SHBA”, deklaroi deputeti i zgjedhur i PD.
Pyetjes nëse PD do të mbajë të njëjtin standard siç ka vepruar në rastet kur SHBA ka shpallur persona “non grata” ish-kryetarin e Bashkisë Durrës, Vangjush Dako dhe deputetin, Tom Doshi, z. Salianji tha se për rastin e Dakos dhe Doshit janë paraqitur prova dhe ndaj janë kërkuar prova dhe për Berishën.
“Siç edhe kemi dëgjuar nga qëndrimi publik i ambasadores ka pasur të dhëna konkrete të çuar në prokurori për rastet në fjalë. Të njëjtin standard kemi kërkuar ashtu siç ka kërkuar edhe vete ish-kryeministri, ka kërkuar prova, ashtu siç me të drejtë një parti politike që përfaqëson gati gjysmën e shqiptarëve, ka kërkuar prova”, u shpreh Salianji.
Më herët, Gjykata e Shkallës së Parë ka dënuar Salainjin me 1 vit burg duke e shpallur fajtor për inskenimin e çështjes “Babale”.
