Presidenti Aleksandër Vuçiç tha se do të ulet për bisedime me serbët e Kosovës, për të marrë pjesë në zgjedhjet e reja në komunat veriore, zgjedhje të cilat po kërkohen me ngulm nga ndërkombëtarët.
ALEKSANDER VUÇIÇ
PRESIDENT I SERBISE
“Dua t’i falënderoj të gjithë ata që po luftojnë për të drejtat e tyre në mënyrë paqësore dhe me dinjitet. Është e rëndësishme që të mbahet paqja dhe të bisedohet me të gjithë”
Në konferencën për shtyp, Vuçiç u fokusua në politikën e brendshme të Serbisë dhe njoftoi se brenda vitit, vendi do të shkojë në zgjedhje të reja.
“Do të shkojmë në zgjedhje të parakohshme. Kjo është shumë e qartë tashmë dhe është vetëm çështje muajsh. Jemi të gatshëm të biem dakord për datën e zgjedhjeve por dua të bëj të qartë që nuk do të ketë qeveri tranzitore. Opozita të marrë pjesë në zgjedhje, të marrë mbështetjen e shumicës së popullit e të formojë qeverinë e re.”
Edhe kryeministrja Ana Bërnabiç, e cila e mori mandatin një vit më parë, u shpreh e gatshme të japë dorëheqjen për t’i dhënë fund krizës politike.
Përveç situatës me serbët e Kosovës, qeveria në Beograd prej muajsh po përballet me një opozitë të pakënaqur dhe protesta të vazhdueshme.
