Të tjera infektime me koronavirus janë konfirmuar sot brenda stafit të kopshtit “10 Korriku” në Berat. 2 edukatore dhe 1 sanitare rezultojnë të jenë infektuar me koronavirus.
Të infektuarat e ditës së sotme ishin të karantinuara që prej 1-jave, kur edhe u konfirmuan rastet e para të infektimit të një edukatoreje dhe një sanitareje në këtë kopsht.
Që prej shfaqjes së rasteve të para të infektimit brenda këtij kopshti, i gjithë stafi i edukatoreve dhe sanitareve ju nënshtrua testimit, ndërkohë që edhe të gjithë fëmijët janë të karantinuar në banesat e tyre. Kopshti më i madh në qendër të qytetit të Beratit vijon të jetë i mbyllur që prej 1-jave, ndërkohë që ende nuk kanë mbërritur të gjitha përgjigjet e testimeve të kryera në këtë kopsht.
Burimet zyrtare pranë DSHP-së Berat bëjnë me dije se, kopshti “10 Korriku” do të vijojë të qëndrojë i mbyllur deri në përfundimit e të gjithë hetimit epidemiologjik të rasteve të kontaktit brenda tij dhe deri në negativizimin e plotë të të gjitha rasteve që janë konfirmuar aty “pozitive”.
Të njëjtat burime konfirmojnë se, të prekur me koronavirus në qarkun e Beratit gjatë muajit të fundit kanë qenë edhe shumë pensionistë, të cilët kanë qenë edhe raste të reja por edhe raste kontakti.
