Amnistia fiskale mblodhi në një takim pa prezencën e medias te gjithë ambasadorët, mes të cilëve edhe i Shteteve të Bashkuara të Amerikës dhe Bashkimit Evropian.
Në vilën qeveritare 30 për më shumë se një orë u fol për projektligjin e hedhur për diskutim për amnistinë fiskale dhe penale për të gjithë ata, kryesisht emigrantë që deklarojnë vullnetarisht të ardhurat e tyre të përftuara nga puna në të zezë.
Sqarimet, veçmas për përfaqësuesit e Shteteve të Bashkuara të Amerikës dhe Bashkimit Evropian që janë deklaruar deri më tani kundër projektligjit të propozuar nga qeveria, ishin ministrja e Financave Delina Ibrahimaj, e Jashtme Olta Xhaçka dhe kryetari i grupit parlamentar të socialistëve Taulant Balla.
Në takim mungoi kryeministri Edi Rama, edhe pse një ditë më parë ai deklaroi se ishte i gatshëm të dëgjonte qëndrimet e SHBA dhe BE-së dhe të bashkëpunonte me ta.
Zyra e shtypit të kryeministrit, nuk ka ende një përgjigje, pse Edi Rama mungoi në mëngjesin e punës me ambasadorët. Pas takimit, për Vizion Plus, delegacioni i Bashkimit Evropian në Tiranë tha se BE është e shqetësuar për projektligjin aktual dhe se do të angazhohet në bisedime për ta rishikuar atë, por pa përmenduar se cilat janë pikat që ata kundërshtojnë.
DELEGACIONI I BASHKIMIT EVROPIAN
“Bashkimi Evropian ka shqetësime serioze për draftin aktual të ligjit për amnisti fiskale. Ne do të vazhdojmë konsultimet me autoritetet përkatëse të qeverisë për të rishikuar këtë legjislacion,” – tha Delegacioni i BE-ne Shqiperi.
Projektligji për amnistinë fiskale u rikthye për konsultim pasi qeveria pyeti qytetarët përmes Këshillimi Kombëtar. Mbi 66 për qind e të pyeturve iu përgjigjën, po të bëhet. Në 2020-ën qeveria e miratoi në Këshillin e Ministrave por nuk shkoi në parlament. Si në atë kohë edhe sot ndërkombëtarët e kundërshtojnë me argumentin se amnistia fiskale përbën një rrezik në krijimin e hapësirave për evazion fiskal dhe të pastrimit të parave që vijnë nga jashtë vendit.
