Gjyqtarja e Apelit të Tiranës, Fatmira Hajdari, po përballet sot me Komisionin e Pavarur të Kualifikimit.
Në kriterin e dytë atë të kontrollit të figurës DSIK konstatoi përshtatshmëri, por KPK kreu verifikime të tjera.
“Na rezulton se në deklaratën për kontrollin e figurës, pyetjes nëse iu është refuzuar hyrja nga vendet e BE apo të NATO-s, gjyqtarja i është përgjigjur jo. Por rezulton se SHBA, shtet anëtar i NATO-s i ka revokuar vizën”, u shpreh KPK.
DSIK më pas informon se ka përcjellë raport të rishikuar, ku grupi i punës konstaton: Në vlerësim të të dhënave Fatmira Hajdari, ka bërë deklarim të pasakte të figurës për vizën. DSIK arrin në përfundimin se Hajdari është e papërshtatshme.
Hajdari nga ana e saj ka thënë se nuk ka pasur refuzim vize dhe sipas saj i është kërkuar me telefon që të paraqitet në ambasadë. Kur është paraqitur dhe i kanë mbajtur pasaportën, i kanë revokuar vizën.
Për këtë çështje avokati i Fatmira Hajdarit, Maks Haxhia u shpreh: “Në formular thuhet tregoni nëse ju kanë refuzuar vizën dhe jo revokuar. Kjo nuk do të thotë që integriteti dhe figura është e cenuar, pasi revokimi është në varësi të vendimit që do merret nga KPK.
Edhe sot e kësaj dite ne nuk dimë datën e saktë se kur u revokua viza, sot do i bëjmë kërkesë ambasadës. Por edhe sikur të kishte dijeni , janë dy koncepte të ndryshme, revokimi dhe refuzimi”. /Top Channel
/shqip