Ambasada e SHBA në Kosovë, ka thënë se Uashingtoni vazhdon të mbështesë kalimin e Forcave të Sigurisë së Kosovës – FSK-së në ushtri profesionale, duke shtuar se asnjë vend nuk mund të “veto” në këtë tranzicion, njoftoi RTK2.
“Shtetet e Bashkuara vazhdojnë të mbështesin tranzicionin e FSK-së në një ushtri multi-etnike, duke ndërvepruar me NATO-n. Asnjë vend nuk mund të vërë ‘vetos’ në këtë tranzicion”, ishte përgjigja që Ambasada e SHBA në Prishtinë i dha RTK2 në lidhje me qëndrimin e administratës amerikane pas miratimit të amendamenteve të Komisionit për Punë të Brendshme të Kuvendit të Kosovës lidhur me Projektligjin për transformimin e FSK-së në një ushtri të Kosovës.
Ambasada e Shteteve të Bashkuara thonë se u kërkon udhëheqësve politikë në Kosovë që të sigurojnë që procesi të vazhdojë në “mënyrë gjithëpërfshirëse, e cila pasqyron natyrën shumetnike të Kosovës.”
“Është thelbësore që Kosova, nga ky moment e tutje, të koordinohet ngushtë me aleatët e NATO-s dhe të angazhohet me të gjithë qytetarët e saj, ndërsa tranzicioni përparon”, thuhet në përgjigje të RTK2.
Ushtria do të operojë në të gjithë territorin e Kosovës, përfshirë Veriun, sipas deklaratës së kryeministrit Ramush Haradinaj.
“Është planifikuar që trupat e saj do të lëvizin në të gjithë vendin, përfshirë dhe Veriun problematik”, tha Haradinaj.
Ndryshe nga Policia e Kosovës, për Forcën e Sigurisë së Kosovës deri më tani ka qenë e nevojshme leja e NATO-s, si dhe ftesa e autoriteteve lokale në mënyrë që të qëndrojë në tri komunat në Veri, të populluara kryesisht nga serbët.
Haradinaj thotë se një kufizim i tillë nuk është më i vlefshëm tani kur paketa e transformimit të FSK-së është e gatshme.
“Ne nuk kemi lënë asnjë hapësirë, është një e tërë: e drejta për një ushtri pa ndonjë kufizim”, tha ai.
Ai bëri këtë deklaratë pas një takimi me Sekretarin amerikan të Mbrojtjes, James Mattis.
