Mjekët e shpallën presidentin amerikan Joe Biden, 80 vjeç, të shëndoshë dhe “të aftë për detyrë” të enjten, pas një ekzaminimi ku iu hoqën lezione nga gjoksi dhe u konstatua se nuk ka pasoja të COVID-19 afatgjatë, pasi ai vitin e kaluar ishte pozitiv për virusin korona.
“Presidenti mbetet i aftë për detyrën dhe plotësisht i aftë për të kryer të gjitha përgjegjësitë e tij pa asnjë heqje dorë apo përshtatje,” tha mjeku i Shtëpisë së Bardhë Kevin O’Connor në një përmbledhje të gjetjeve mjekësore.
“Biden është një burrë i shëndetshëm, i fortë 80-vjeçar”, shkroi ai.
Kontrolli mjekësor u ndoq nga afër teksa Biden pritet të shpallë kandidaturën e tij për një mandat të dytë presidencial.
Në përmbledhje thuhej se Biden nuk kishte asnjë simptomë të COVID-19 afatgjatë dhe se ecja e tij e ngurtë nuk ishte përkeqësuar që nga ekzaminimi i tij i fundit.
Ekzaminimi tre-orësh në Qendrën Mjekësore Ushtarake Kombëtare Walter Reed në periferi të Uashingtonit ishte ekzaminimi i tij i dytë i gjerë që nga marrja e detyrës në janar 2021.
“Shumë i vjetër për të drejtuar qeverinë amerikane”
Ai kishte një ekzaminim të mëparshëm sistematik më 19 nëntor 2021, duke përfshirë një kolonoskopi nën anestezi të përgjithshme, dhe rezultatet e ekzaminimit më pas treguan se ai ishte një “burrë i shëndetshëm, i fortë, 78-vjeçar”.
Atij iu hoq një polip nga zorra e trashë dhe iu korrigjua dioptria e lenteve të kontaktit.
Biden është personi më i vjetër që mban postin e Presidentit të Shteteve të Bashkuara të Amerikës dhe për shkak të këtij fakti, aftësia e tij vihet në pikëpyetje.
Tre të katërtat e amerikanëve, duke përfshirë më shumë se gjysmën e demokratëve dhe një shumicë të madhe të republikanëve, mendojnë se Biden është shumë i vjetër për të udhëhequr qeverinë amerikane, sipas një sondazhi të Reuters/Ipsos të kryer nga 6-13 shkurt.
Pavarësisht rezultateve të dobëta të sondazheve, Biden ka kohë që ka shpallur se synon të kandidojë sërish, gjë që mund ta çojë në një përplasje të re me paraardhësin e tij Donald Trump, i cili tashmë ka konfirmuar kandidaturën e tij.
