Ministri i Mbrojtjes i Turqisë, Hulusi Akar, ka theksuar rëndësinë e dialogut me Rusinë dhe Ukrainën, si dhe ka deklaruar se vendi i tij do të vazhdojë të respektojë rregullat e vendosura nga Konventa e Montreux-it për kalimin e anijeve në ngushticat e Detit të Zi.
“Nga statusi i ngushticave (përsa i përket rregullave për kalimin e anijeve të vendeve me bregdet në Detin e Zi dhe vendeve pa bregdet në Detin e Zi) i vendosur nga konventa përfitojnë të gjitha palët. Në rrethanat aktuale, nuk bëhet fjalë për braktisjen e kësaj konvente. Për sa i përket dialogut të Detit të Zi, Turqia po bën gjithçka që duhet. Ne do të vazhdojmë dialogun tonë me Rusinë dhe Ukrainën dhe do të përmbushim detyrimet tona të NATO-s”, citoi transmetuesi turk TRT ministrin Akar.
Akar elaboroi situatën në rajonin e Detit të Zi, duke theksuar se dialogu i Turqisë me Ukrainën dhe Rusinë vazhdon ndërkohë që ajo merr përsipër përgjegjësitë e saj në kuadër të NATO-s si pjesë e aleancës.
Ai theksoi se Konventa e Montreux-it e vitit 1936 rregulloi regjimin e ngushticave turke dhe kalimi i anijeve luftarake detare në Detin e Zi është thelbësor për sigurinë dhe stabilitetin në rajon.
Duke iu referuar tensioneve të fundit mes Rusisë dhe Ukrainës e Perëndimit, ai paralajmëroi se kjo paraqet rrezikun e përshkallëzimit të pakontrolluar.
“Ne si Turqi u bëjmë thirrje të gjitha palëve të interesuara të qëndrojnë të qetë dhe të angazhohen në koordinim, bashkëpunim dhe dialog”, tha ai.
SHBA me aleatët e saj evropianë kanë paralajmëruar se Rusia po përgatit skenën për një pushtim të Ukrainës dhe se ka vendosur paraprakisht mbi 100 mijë trupa në kufirin e saj me ish-republikën sovjetike, së bashku me vendosje të konsiderueshme të artilerisë dhe tankeve.
Moska ka mohuar përgatitjen për një ofensivë ushtarake, duke theksuar se trupat e saj janë atje për stërvitje të rregullta.