Sekretari amerikan i Mbrojtjes Lloyd Austin pësoi një infeksion të traktit urinar pas një operacioni për të trajtuar diagnozën e tij të kancerit të prostatës, thanë mjekët. Në deklaratë, ata theksuan se kanceri është zbuluar herët dhe thonë se prognoza është e shkëlqyer.
Lloyd Austin, 70 vjeç, u përball me kritika pasi u zbulua se zyrtarë të lartë ushtarakë dhe Shtëpia e Bardhë nuk ishin në dijeni të vizitës së tij në spital tre ditë më parë.
Ai kërkoi falje për mungesën e njoftimit publik, duke thënë se nuk kishte “bërë gjithçka në fuqinë e tij për ta mbajtur publikun të informuar siç duhet”.
Pentagoni konfirmoi se Austin mbeti i shtruar në spital pas një operacioni të suksesshëm. Zëdhënësi nuk ka dhënë më shumë informacion se kur do të shkarkohet.
“Rimëkëmbja e Sekretarit Austin po përparon mirë, ai është në gjendje shpirtërore të mirë, është në kontakt me stafin e tij të lartë dhe ka akses të plotë në mjetet e nevojshme të sigurta të komunikimit dhe vazhdon të monitorojë operacionet e përditshme të Departamentit të Mbrojtjes në mbarë botën,” tha zëdhënësi për gazetarët.
Lloyd Austin u pranua në spital më 22 dhjetor 2023 për një procedurë kirurgjikale “minimisht invazive” për të hequr kancerin.
Ai u rikthye në spital më 1 janar 2024 pasi lindën “komplikime” nga procedura dhe një vlerësim zbuloi një infeksion të traktit urinar. Ai është dërguar në repartin e terapisë intensive për trajtim të mëtejshëm.
Austin u kritikua pasi nuk informoi Shtëpinë e Bardhë dhe zyrtarët e lartë të Pentagonit për qëndrimin e tij në spital. Zëvendës Sekretarja e Mbrojtjes Kathleen Hicks nuk u informua për qëndrimin e tij në spital, pavarësisht se iu kërkua të merrte disa nga përgjegjësitë e tij.
Shefi i stafit të Shtëpisë së Bardhë, Jeff Zients, udhëzoi anëtarët e kabinetit të presidentit që të njoftojnë kur nuk janë në gjendje të kryejnë detyrat e tyre, raporton BBC.
