Rëndohet situata nga përmbytjet në veri të vendit. Problemet më të mëdha janë në qarkun e Shkodrës, aty ku niveli ujit është rritur edhe më shumë ndërsa banorët e fshatrave janë izoluar. E vetmja rrugë për t’u lidhur me pjesën tjetër të vendit, për banorët e Shkodrës është ajo e njësisë Administrative Guri i Zi.
Këto janë pamjet e fshatit Obot. Të gjitha banesat janë të rrethuara nga uji, i cili po përparon me shpejtësi drejt tyre. Rruga e vetme e komunikimit me banorët është përmes varkave dhe mjeteve të ushtrisë. Kjo pasi niveli i ujit në rrugë shkon mbi 65cm.
BARDH SPAHIA – KRYEBASHKIAK I SHKODRES
Ka pasur një rritje të nivelit të ujit. Gjë e cila ësthë kthyer në problematikë për banorët e këtyre zonave. Momentalisht janë të izoluar. Po punoeht tu krijohet akses atyre qoftë për të marr shërbimet e domosdoshme. Bashkia ka marrë masat e duhura edhe me përfaqësuesit tanë, drejtuesit e njësive administrative. Është një situatë realisht e vështirë.
Si rrjedhojë e prurjeve të mëdha të lumit Drin e Kir, në urën e bahçallëkut nuk lejohet kalimi i njerëzve dhe automjeteve. Kjo pasi nga rrënimi e urës së vjetër rrezikon dhe ura ekzistuese.
E kemi mbyllur dhe për njerëzit pasi paraqet rrezikshmëri të lartë. Nuk dihet gjendja. Aktualisht shkodra është e izoluar, nga pjesa tjetër e Shqipërisë.
Kryebashkiaku i Shkodrës, Bardh Spahia, tha se përmbytjet kanë ardhur si rrjedhojë e hapjes së portave të hidrocentraleve. Sipërfaqja e përmbytur raportohet mbi 2000 hektarë. Deri më tani janë evakuuar 32 familje ndërsa janë përmbytur 590 banesa.
Situatë e vështirë është dhe në Lezhë. Për shkak të daljes nga shtrati të lumit Gjadër janë izoluar 15 familje. Ndërkohë ne të gjithë qarkun raportohet për 8 banesa të përmbytura. Edhe lumi Ishëm doli gjatë natës nga shtrati, por ka pasur vetëm përmbytje të tokave bujqësore.
