Dy bomba molotov kanë shpërthyer në veri të Mitrovicës. Njëra është hedhur pranë stacionit policor, ndërsa tjetra pranë shkollës teknike.
Lajmin e ka bërë të ditur zëvendësdrejtori rajonal i policisë në Mitrovicë, Veton Elshani, sipas të cilit situata aktualisht është stabilizuar.
Ai ka theksuar gjithashtu se, në Leposaviq një numër i vogël qytetarësh janë mbledhur për të protestuar edhe këtë të shtunë.
Situata në tri komunat në veri të vendit, Zveçan, Leposaviq dhe Zubin Potok është e tensionuar që prej të premtes së 26 majit, kur kryetarët e betuar tentuan të hyjnë në zyrat e tyre të punës, nën mbikëqyrjen e policisë së Kosovës.