Italia do të investojë në kompaninë lokale bioteknologjike ReiThera për të mbështetur zhvillimin e vaksinës së saj COVID-19, tha një zyrtar i lartë të martën fill pasi qeveria i quajti inkurajuese rezultatet e Fazës 1.
Faza fillestare përfshiu 45 vullnetarë të moshës midis 18 dhe 55 vjeç. “Askush prej tyre nuk tregoi efekte anësore serioze gjatë 28 ditëve pas vaksinimit”, u shprehGiuseppe Ippolito, drejtori shkencor i institutit Lazzaro Spallanzani të Romës i cili zhvilloi testet.
“Rreth 92.5% e vullnetarëve kishin nivele të zbulueshme të antitrupave neutralizues,” tha ai, duke shtuar se provat ishin planifikuar të përfundonin në verë.
Domenico Arcuri, komisioneri i urgjencave të COVID-19 në Italië, tha se qeveria do të investojë në ReiThera për të mbështetur kërkimin shkencor dhe t’i sigurojë Italisë pavarësi në prokurimin e vaksinës.
Zyra e tij nuk tha se sa para do të investohen.
“Nëse të dhënat e marra deri më tani konfirmohen, në muajt e ardhshëm do të kemi një vaksinë efektive dhe të sigurt me një dozë të vetme,” tha Ministri i Shëndetësisë Roberto Speranza në një deklaratë.
Vaksina ReiThera bazohet në një të ashtuquajtur vektor adenoviral jo-replikues, të njëjtën teknologji që AstraZeneca dhe Johnson & Johnson kanë përdorur në vaksinat e tyre.
Kryetari i ReiThera Antonella Folgori tha se kompania synonte të prodhonte rreth 100 milion doza në vit, të cilat mund të ruhen në mes 2 dhe 8 gradë Celsius.
Italia po mbështetet plotësisht në një iniciativë të përbashkët të prokurimit të Bashkimit Evropian për vaksinat COVID-19, e cila deri më tani po përdor vetëm vaksinën e zhvilluar nga Pfizer dhe BioNTech ndërsa blloku pret që vaksinat e tjera të miratohen nga Agjencia Evropiane e Barnave.
/faxweb
