Detaje të reja janë zbardhur nga ngjarja që ndodhi pak ditë më parë në një provincë në Breshia të Italisë, ku u ekzekutua një shqiptar 33-vjeçar.
Mediat italiane bënë me dije se shqiptari Alfons Kola u vra me thikë jashtë një lokali nga bashkëatdhetari i tij dhe u la në mes të rrugës.
Kola më pas u transportua për në spital, por për shkak të plagëve të marra nuk arriti të mbijetonte, pavarësisht se i ishte nënshtruar një operacioni delikat.
Një person është në arrest për vrasjen. Bëhet fjalë për Petrit Gegën, 52 vjeç, bashkatdhetar i viktimës, që dyshohet se ishte sulmuesi i 33-vjeçarit dhe u ndalua nga karabinierët pasi ishte arratisur.
Mësohet se si viktima Alfons Kola ashtu edhe autori Petrit Gega janë nga fshati Kallmet Vogël i Lezhës. Banesat e tyre në këtë fshat janë vetëm pak metra larg njëra-tjetrës.
Sipas banorëve familjet kanë pasur marrëdhënie shumë të mira me njëra-tjetrën dhe janë të tronditur nga kjo ngjarje.
