Tërmeti i fuqishëm që dridhi Greqinë e 6 shtete të tjera, e pati epiqendrën në Florina (Follorinë), një qytet jo shumë larg Korçës e fare pranë kufirit jugor me Maqedoninë e Veriut.
Media publikoi dhe disa pamje të një kamere në brendësi të një shtëpie në Florina, ku dridhjet e tërmetit janë të frikshme.
Në qytetin grek janë regjistruar një sërë dëmesh materiale, por fatmirësisht nuk ka patur lëndime serioze në njerëz. Banorët e Florinës u tronditën nga lëkundjet dhe shumë prej tyre kanë zgjedhur ta kalojnë natën jashtë banesave ose nëpër makinat e tyre.
Ndërkohë në Shqipëri ka patur deri më tani 6 raportime për dëmtime të banesave në zonën e Devollit, përgjithësisht në godina të vjetra. Banorët kanë njoftuar instancat lokale në lidhje me situatën e aktualisht është raportuar për dëmtime në 2 banesa në Bilisht, 2 në fshatin Mançurisht e 2 në fshatin Shuec.
Momente frike kanë përjetuar dhe banorët në Maqedoninë e Veriut, ku lëkundjet janë ndjerë njëlloj fuqishëm. Tv21 raportoi se shumë banorë të Manastirit kanë lëshuar shtëpitë për të kaluar natën jashtë.
“U frikësuam, si jo. Menduam se shtëpitë do të rrënohen”, tha një qytetare.
“Nesër duhet të jetë ditë jo pune për Manastirin, si do të shkojmë në punë? Kush do të hyjë në shtëpi tani?”, shtoi një qytetar.
“Mendoj të kthehem në shtëpi, nuk di çfarë të bëj. Është ftohtë”, tregoi një tjetër qytetare për median.