Emri ballokume lidhet instiktivisht me qytetin e Elbasanit. Kjo ëmbëlsirë e veçantë është traditë e këtij qyteti dhe e Festës së Ditës së Verës. Por si ka ardhur emri ballokume dhe cilat janë sekretet për ta gatuar njësoj si amvisat e Elbasanit?
Emri ballokume erdhi në fund të shekullit XVIII dhe u dha nga sanxhakbeu i Elbasanit i cili pasi shijoi kulaçin e vogël tha “është ba si llokume” dhe që atëherë thirret me emrin Ballokume.
Shefi i kuzhinës, Mirsad Tagani, i ftuar në emisionin ‘7pa5’ në Vizion Plus të moderuar nga Alma Çelaj dhe Syrjan Rahova ka treguar edhe sekretet e kësaj recete.
Mirsad Tagani: Është një recetë e cila i ngel gjithmonë Elbasanit dhe duhet ndjekur në hapat e origjinës së saj. Sekreti i saj në recetë është…ka një proces të gjatë. Duhet të punohet në enë bakri gjithmonë. Tjetra që është kryesore, është gjalpi. Duhet të jetë një gjalp sa më i vjetër, 8-9 muaj. Ka një procedurë të gjatë, do pak nerva. Gjalpi bashkë me sheqerin duhet të përzihen për gati 30 minuta. Ka dhe një sekret tjetër. Në një lëvozhgë veze të shpërlarë nga uji, marrin një pjesë të hirit. Por duhet të jetë një person që e ka përdorur dhe e ka trashëguar.
Të përdoret hiri i drurit brenda në ballokume duhet të dish si ta bësh. Sheqeri duhet të jetë i bluar që gjatë kohës që të përzihet me gjalpin të ketë një përbërje kremoze të mirë. Pastaj ka dhe miellin e misrit ka dhe miellin normal. Në fund janë dhe vezët të cilat duhet të thyhen dhe të hidhen avash avash. Sekreti i saj është në momentin kur ti e vendos në tavë nuk duhet ngjeshur. Duhet të vendosësh dhe një letër furre që mos ngjitet dhe lihet në furrë për 15 minuta. Unë e kam provuar nallokumen në të gjitha zonat, por më e mira është ajo e Elbasanit. Sado ta sjellim, sado të kemi recetën dhe pasion, zanafilla dhe shija se si duhet të jetë vjen nga Elbasani. /
