A mund të ndikojnë zakonet tona të përditshme në shfaqjen e kancerit? Sigurisht që po.
Ja disa praktika të përditshme që mund të zvogëlojnë rrezikun e kancerit:
- Ruajtja e peshës normale të trupit
Më shumë se 60% e njerëzve në vendet perëndimore janë mbipeshë ose obezë. Pesha e tepërt rrit rrezikun e llojeve të ndryshme të kancerit, duke përfshirë ato të ezofagut, pankreasit, zorrës së trashë, veshkave dhe tiroides. Është vlerësuar se nëse çdo i rritur në Shtetet e Bashkuara do të ulte indeksin e masës trupore me 1%, kjo mund të zvogëlonte numrin e rasteve të reja të kancerit deri në 100,000.
- Zvogëloni konsumin e mishit të kuq
Konsumi i shpeshtë i mishit të kuq është lidhur me një rrezik më të lartë të kancerit të zorrës së trashë dhe stomakut. Instituti Amerikan për Kërkime mbi Kancerin rekomandon jo më shumë se 1 porcion në javë.
- Përdorni krem mbrojtës nga dielli
Ekspozimi i shpeshtë dhe i zgjatur ndaj rrezatimit ultravjollcë mund të shkaktojë kancer të lëkurës. Shumica e rasteve janë të shërueshme nëse zbulohen dhe trajtohen herët, por ato mund të jenë kërcënuese për jetën nëse përhapen në pjesë të tjera të trupit. Kremi kundër diellit me një SPF prej 30 ose më të lartë ndihmon në parandalimin e tij.
- Konsumimi i shpeshtë i perimeve dhe frutave
Perimet dhe frutat mund të ndihmojnë në parandalimin e një numri kanceresh, duke përfshirë ato të gojës, qafës së mitrës, trakesë dhe ezofagut. Këto ushqime kanë substanca që ndihmojnë qelizat të parandalojnë dëmtimet që më vonë mund të çojnë në kancer. Ne duhet të marrim të paktën 3 racione frutash dhe perimesh në ditë.
- Ulni konsumin e sheqerit
Ushqimet ose pijet me shumë sheqer kanë tendencë të kenë më shumë kalori. Nëse i hamë shpesh, ka më shumë të ngjarë të marrim më shumë kalori sesa konsumojmë në ditë. Kjo mund të çojë në obezitet dhe kështu të rrisë rrezikun e zhvillimit të kancerit. Gjithashtu çon në hiperinsulinemi e cila shkakton rrugë kancerogjene.
- Vaksinimi kundër HPV-së dhe virusit të hepatitit B
Papillomavirusi njerëzor (HPV) shpesh përhapet nga një person te tjetri nëpërmjet kontaktit seksual. Ai shkakton kancer të qafës së mitrës tek gratë dhe gjithashtu mund të shkaktojë kancer të vaginës, penisit, anusit dhe gojës. Vajzat mund ta marrin vaksinën midis moshës 9 dhe 26 vjeç, dhe djemtë midis moshës 9 dhe 21 vjeç.
Përdorimi i prezervativit gjithashtu mund të zvogëlojë shanset për t’u infektuar me HPV. Njerëzit që kanë hepatit B kanë 100 herë më shumë gjasa të zhvillojnë kancer të mëlçisë. Dhe njerëzit që kanë probleme kronike të mëlçisë, kanë partnerë të shumtë seksualë ose ndajnë gjilpëra për përdorimin e drogës janë në rrezik të lartë për t’u infektuar me hepatit B, së bashku me njerëzit që punojnë me gjak njerëzor. Por vaksinimi i hershëm mund të parandalojë infeksionin.
- Ushtrime sistematike.
Njerëzit që ushtrohen rregullisht kanë më pak gjasa të zhvillojnë kancer të zorrës së trashë, gjirit ose mitrës. Me aktivitetin fizik të përditshëm, trupi përdor më shumë energji dhe parandalon akumulimin e hormoneve dhe substancave të caktuara të lidhura me kancerogjenezën. Ushtrimet gjithashtu ndihmojnë në trajtimin e problemeve të tjera shëndetësore, të tilla si diabeti dhe sëmundjet kardiovaskulare.
- Lënia e duhanit.
Edhe pse përqindja e njerëzve që pinë duhan çdo ditë në SHBA dhe Evropë ka rënë nga më shumë se 40% në vitet 1960 në rreth 10%, duhani është ende shkaku i parë i modifikueshëm i vdekjes, pasi çon në kancer dhe probleme kardiovaskulare.
- Zvogëlimi i konsumit të alkoolit.
Konsumi i tepërt i alkoolit mund të rrisë rrezikun e kancerit të sistemit tretës, siç është ezofagu, stomaku, mëlçia dhe zorrës së trashë, si dhe kanceri i gjirit. Burrat nuk duhet të pinë më shumë se dy pije në ditë dhe gratë duhet të kufizohen në një.
- Kontrollet parandaluese
Sa më shpejt të zbulohen shenjat paralajmëruese të kancerit, aq më të mëdha janë shanset për shërim. Një sërë testesh parandaluese janë në dispozicion për lloje të ndryshme të kancerit këto ditë, të tilla si mamografia për kancerin e gjirit, kolonoskopia për kancerin e zorrës së trashë, matja e PSA për kancerin e prostatës ose skriningu i nishaneve për kancerin e lëkurës.
