Si mundet ushqimi të ndihmojë kundër pandemisë së COVID 19? Përditësim i udhëzimeve dietetike

Nga dietologia Blerina Bombaj

Nisur nga qarkullimi i materialeve të shumta këshilluese mbi ushqimin dhe pandeminë që shoh shumë shpesh në rrjetet sociale, shpeshherë të pabaza, e ndiej për detyrë të paraqesë udhëzimet dietetike të përditësuara, të bazuara në studime dhe argumente shkencor.

Një dietë e ekuilibruar garanton një sistem imunitar të fortë, i cili mundet të përballojë çdo sulm viral. Deri më tani nuk ka të dhëna bindëse se marrja e suplementeve do të forcojë sistemin tonë imunitar, përveç vitaminës C e cila është provuar të jetë vërtetë efikase në forcimin dhe mbarëvajtjen e mekanizmave tanë mbrojtës kundër viruseve dhe jo vetëm. E në fakt kjo është afërmendsh, për faktin se trupi ynë nuk prodhon dot vetë vitaminë C, ai është i varur nga ushqimi për plotësimin e nevojave te tij. Sasia ditore e nevojshme e vitaminës C është 90mg/dite për burrat dhe 75gr/ditë për gratë. Duhanpirësit kanë nevoja edhe më të rritura, po ashtu gratë shtatzëna dhe me gji dhënie.

Është shume e rëndësishme të jemi në dijeni të ushqimeve të caktuara që mund të përmirësojnë mbrojtjen tonë imunitare. Më poshtë do të gjeni udhëzime ushqimore profesionale, për të përballuar me më shumë sukses COVID-19.

1. Konsumoni fruta çdo ditë (mollë, portokalle, mandarina, shege, hurma, banane, qitro, boronica, manaferra, kumbulla, kivi).
2. Konsumoni çdo ditë perime (hudhra, xhinxher, brokoli, speca, spinaq, lakër të bardhë, karotë, kungull të verdhë, qepë, presh, lulelakër, lakra jeshile), rreth 2,5 kupa ne dite dhe legume (fasule, thjerrëza, qiqra).
3. Konsumoni drithëra të plotë (integrale) dhe fruta të thatë si arra, bajame, lajthi. 180gr drithëra të plotë në ditë si tërshëra, kuinoa, elbi, buka e thekrës, makaronat integrale).
4. Mishi i kuq (natyral dhe i freskët) mund të konsumohet 1-2 herë në javë, i gatuar në tenxhere me shumë erëza, qepë dhe hudhra; mishi i pulës mund të konsumohet 2 herë në javë, I gatuar kryesisht në formë supe me limon dhe vezë dhe peshku 2-3 herë në javë, duke lënë vend edhe për ditë pa mish por me fasule.
5. Për vakte te ndërmjetëm përdorni fruta të freskët dhe perime si karota. Për pak me shumë kalori mund të përdorni buke integrale me pak gjalpë susami; qiqra te pjekur, kos me fruta të freskët ose pak avokado me kos; si dhe cajra bimor dhe antiinflamator si çaji i xhinxherit me turmerik dhe kanelle; çaji jeshil; çaj mali me pak trumzë dhe rigon; dhe pak mjaltë të mirë e limon.
6. Këshillohet që perimet të mos gatuhen së tepërmi pasi humbin shumë nga lëndët ushqyese.
7. Ushqimi të përgatitet dhe shërbehet ne temperaturat e duhura.

Kufizoni kripën në jo më shumë se 5gr në ditë.

8. Preferoni me shpesh yndyrna bimore cilësore (vaji i ullirit dhe susamit, avokado) si dhe yndyrnat nga peshku.
9. Konsumi i 8-10 gotave ujë përfshirë edhe cajrat pa sheqer, çdo dite është thelbësor për rregullimin e temperaturës se brendshme, transportin e lendeve ushqyese nëpërmjet gjakut në të gjithë organet dhe qelizat e trupit dhe largimin e mbetjeve toksike apo te panevojshme nga trupi.
10. Është mirë të evitohen krejtësisht pijet me gaz, lëngjet dhe cajrat e gatshëm që përmbajnë sheqer.
11. Praktikoni një regjim të shëndetshëm jetese duke u shplodhur dhe fjetur mjaftueshëm, si dhe duke ushtruar aktivitet fizik rregullisht. Gjumi i mjaftueshëm është thelbësor për imunitetin.

Hani në shtëpi!

Përbërës të tjerë që mund te ndihmojnë:

-Propolis

-Çaj me trumzë, çaj mali, rigon, dafine, lëkurë limoni dhe pak mjaltë të mirë

-Mjaltë cilësor

-Vaj i farës së zezë

-Vaj peshku

-Vitamine D (nëse keni mungesë)

Një regjim ushqimor i shëndetshëm mund të sigurojë një sistem imunitar të aftë të përballojë betejat virale dhe çdo sulm tjetër. Jepjani vetes këtë mundësi me atë çka vendosni çdo herë në pjatë.