Nga ora 22.00 deri në 06.00 e gjithë Shqipëria është në karantinë. Por ata që kanë të domosdoshme lëvizjen brenda kësaj fashe orare duhet të aplikojnë në portalin e-albania për t’u pajisur me autorizim.
Aty mund të kërkojnë leje qytetarët për punë apo arsye të domosdoshme, por edhe bizneset për transportin e punonjësve e ofrimin e shërbimeve të tyre. Qytetarët duhet të identifikohen në portal, të klikojnë shërbimin “Leje për dalje”, më pas butonin “Përdor” dhe pastaj zgjidhet lloji i lejes që nevojitet.
Duhet të specifikohet nëse lëvizja do të kryhet në këmbë apo me makinë, të shkruhet saktë data si edhe arsyeja e lëvizjes. Sapo të klikoni “Dërgo”, do të merrni e-mailin dhe sms konfirmuese. Këto të fundit duhen ruajtur ose në të kundërt do të gjobiteni nga policia.
