Përzerje, dhimbje barku, diarre ose të vjella – dhe herë pas here temperatur dhe ethe. Helmimi me ushqim është zakonisht shumë i pakëndshëm. Por është e rëndësishme që ushqimi i prishur të gjejë rrugën e tij dhe të dali nga trupi sa më shpejt të jetë e mundur. Simptomat tipike të pakëndshme janë të nevojshme për vetërregullimin e tretjes.
Në përgjithësi, ka shkaqe të ndryshme të helmimit nga ushqimi: Nga njëra anë, ka mundësi që disa mikroorganizma të kenë ndryshuar ushqimin në atë mënyrë që të jenë formuar toksina. Kjo ndodh, për shembull, kur myku përhapet në bukë ose kos. Sporet e dëmshme të mykut lëshojnë produkte metabolike që janë toksike për njerëzit.
Nga ana tjetër, ka baktere të caktuara në ushqim që shumohen në traktin tretës – dhe shkaktojnë probleme atje. Acidi i stomakut vret shumicën e këtyre patogjenëve. Por, nëse ka një sasi të lartë të patogjenëve në ushqim acidi I stomakut nuk ka mundësi tja dali. Bakteret më pas gjejnë kushte të favorshme në zorrët për t’u përhapur. Këto mikrobe jo vetëm që mund të lëshojnë metabolitë toksikë, por gjithashtu mund të prishin florën e përgjithshme të zorrëve. Kjo mund të çojë në simptoma të rënda. Një shembull i kësaj është një infeksion me salmonelë.
Këto rreziqe mund të parandalohen kryesisht me masat e mëposhtme:
Asnjëherë mos ruani ushqimet delikate pa frigorifer
Të gjithë e dinë se kosi, qumështi dhe sallami i përkasin frigoriferit. Por gjella e gatuar shpesh here mbetet në tenxhere sipër sobës – për disa orë ose edhe gjatë natës. Kjo mund të ketë pasoja të rënda, veçanërisht në verë. Pavarësisht nëse bëhet fjalë për supë me makarona, perime të skuqura ose salcë me mish të grirë: nëse lihen pa frigorifer, bakteret patogjene mund të përhapen – dhe të sekretojnë toksina.
Kur nxehet përsëri, bakteret vriten – por helmi nuk neutralizohet! Problemi nuk është vetë ringrohja, por ndoshta ftohja e pamjaftueshme paraprakisht!
Nëse i mbani në frigorifer gatimet tuaja mund t’i ngrohni dhe ti konsumoni pa asnjë problem të nesërmen.
Ruani zinxhirin e ftohtë të ushqimeve
Ftohja duhet të jetë e duhur jo vetëm në katër muret tuaja, por edhe kur transportoni sendet ushqimore nga dyqani në shtëpinë tuaj. Rregullore të rrepta zbatohen për tregtinë ushqimore për pajtueshmërinë me të ashtuquajturin zinxhir të ftohtë. Por kur dilni nga supermarketi me shportën tuaj të blerjeve, zinxhiri zakonisht ndërpritet në mënyrë të pashmangshme.
E rëndësishme është ti trasportoni ushqimet në shtëpi sa më shpejt të jetë e mundur.
Gatim i mjaftueshëm i ushqimeve
Për të parandaluar hyrjen e patogjenëve të rrezikshëm në traktin gastrointestinal, është e rëndësishme që ushqimet delicate të ngrohen mjaftueshëm. Këto përfshijnë – veçanërisht në verë – vezët, peshkun dhe mishin.
Tregoni kujdes të veçantë me fëmijët
Sipas Shoqatës Profesionale të Pediatërve dhe Adoleshentëve (BVKJ), rreth gjysma e sëmundjeve të shkaktuara nga ushqimi prekin fëmijët, veçanërisht fëmijët nën moshën katër vjeç. Arsyeja: Për shkak të peshës së tyre më të ulët trupore, kërkohet një numër më i vogël i mikrobeve për të shkaktuar një sëmundje. Përveç kësaj, stomaku i tyre prodhon më pak acid që mund t’i bëjë patogjenët të padëmshëm dhe sistemi i tyre imunitar ende nuk është zhvilluar plotësisht. Prandaj, rekomandohet t’u jepni fëmijëve vetëm vezë shumë të ziera për të ngrënë – dhe të shmangni plotësisht mishin të pa gatuar dhe peshkun të pa gatuar.
Nëse simptomat shfaqen pavarësisht të gjitha masave paraprake, është e rëndësishme të mbani një sy në rrezikun e dehidrimit. Veçanërisht në mes të verës, diarreja ose të vjellat mund të çojnë në humbje të shpejtë dhe të konsiderueshme të lëngjeve nëse keni helmim nga ushqimi. E rëndësishme është të pini sa më shumë që të jetë e mundur, edhe nëse kjo mund të jetë e vështirë. Përveç çajrave bimorë, ideale janë edhe lëngjet e perimeve.
Helmimi nga ushqimi zakonisht përmirësohet pas një ose dy ditësh. Megjithatë, nëse simptomat vazhdojnë për një periudhë më të gjatë kohore, duhet patjetër të shkoni te mjeku.
Përshtati nga Gjermanishtja në Shqip: Marsida Bregasi
Burimi: https://www.hkk.de/themen/ernaehrung/lebensmittelvergiftungen-vermeiden
