Protestuesit i vunë flakën shtëpisë së K.P. Sharma Oli – U bëj thirrje të gjitha palëve të tregojnë përmbajtje dhe të fillojnë negociatat, tha presidenti, i cili po kërkon një kryeministër të ri.
Protestuesit i vunë flakën ndërtesave qeveritare, stacioneve të policisë dhe shtëpive të politikanëve në kryeqytetin e Nepalit, Katmandu, ndërsa trazirat vazhduan për të dytën ditë, pavarësisht dorëheqjes së Kryeministrit K.P. Sharma Oli dhe heqjes së kufizimeve në mediat sociale.
Dorëheqja e Olit pa një zëvendësues e ka lënë vendin praktikisht “pa kokë”. Disa zyrtarë të tjerë të lartë kanë dhënë gjithashtu dorëheqjen, sipas New York Times. Të hënën, autoritetet hapën zjarr ndaj një turme protestuesish të rinj, duke vrarë të paktën 19 persona, në një nga trazirat sociale më të përhapura në vitet e fundit në vendin e Azisë Jugore.
Protestuesit i vunë flakën shtëpisë së K.P. Sharma Oli dhe hodhën mobilje për të ndezur flakët, duke thyer dritaret me gurë dhe tulla. Në mesditë, K.P. Sharma Oli njoftoi dorëheqjen e tij, “në mënyrë që të ndërmerren hapa drejt një zgjidhjeje politike”, tha ai në një letër drejtuar Presidentit të Nepalit, Ramchandra Poudel. Një këshilltar i Poudel i tha Reuters se dorëheqja ishte pranuar dhe se presidenti kishte filluar “procesin dhe diskutimet për një udhëheqës të ri”.
“Qeveria ka rënë, të rinjtë kanë fituar dhe kanë marrë kontrollin e vendit”, tha një protestues, Sudan Gurung. “E ardhmja na përket neve”.
Sipas Reuters, të rinjtë hynë në kompleksin parlamentar pasi dëgjuan thirrje për dorëheqjen e kryeministrit, duke ngritur duart lart dhe duke brohoritur slogane ndërsa tymi ngrihej nga pjesë të ndërtesës. “Ne fituam”, shkroi një protestues me shkronja të mëdha portokalli në një mur të ndërtesës së parlamentit, ndërsa një tjetër aty pranë bëri shenjën e fitores me gishtat e tij.
Edhe pse protestuesit janë ende të pranishëm në rrugët e qytetit, nuk ka pasur përleshje apo dhunë pasi forcat e sigurisë nuk kanë ndërhyrë ose nuk kanë tentuar të përdorin forcë, thanë dëshmitarët për Reuters. Pavarësisht shtetrrethimit që hyri në fuqi këtë mëngjes, grupe protestuesish të rinj dolën në rrugët e Katmandusë dhe sulmuan ndërtesat publike dhe rezidencat e udhëheqësve politikë.
Presidenti i Nepalit ka bërë thirrje për unitet kombëtar. “U bëj thirrje të gjithëve, përfshirë protestuesve, të punojnë së bashku për një zgjidhje paqësore të situatës së vështirë në vend”, tha Presidenti Ramchandra Poudel në një deklaratë pasi protestuesit i vunë flakën ndërtesës së parlamentit dhe zyrës së tij. “U bëj thirrje të gjitha palëve të tregojnë përmbajtje, të mos shkaktojnë dëme të mëtejshme në vend dhe të angazhohen në negociata”, shtoi ai.
Vdekjet në Katmandu
Të hënën, policia hapi zjarr ndaj mijëra protestuesve që demonstronin në rrugët e Katmandusë për të kërkuar fundin e ndalimit të mediave sociale të urdhëruar katër ditë më parë dhe për të denoncuar korrupsionin e elitave të vendit. Të paktën 19 persona u vranë, 17 prej tyre në kryeqytet, dhe qindra u plagosën, sipas një numërimi zyrtar.
Në mbrëmje, kryeministri urdhëroi rivendosjen e mediave sociale dhe nisjen e një hetimi “të pavarur” mbi rrethanat që lidhen me ndërhyrjen e policisë.
Bllokimi i mediave sociale