Qytetarët u mblodhën pasditen e sotme (e enjte, 16 Nëntor) para Ministrisë së Shëndetësisë në një protestë për mungesën e ilaçeve pranë Onkologjikut.
Aktivistët, por jo vetëm shprehen se ndonëse kanë adresuar shqetësimet e tyre tek të gjitha institucionet përkatëse nuk ka kanë marrë asnjë reagim lidhur me këtë çështje.
“Duhet vënë theksin te terapitë inovative. Ka pasur por janë ndërprerë. Dua të vë theksin se nuk ka pasur asnjë reagim nga institucionet”, u shpreh një aktiviste.
Pjesëmarrës në protestë ka qenë dhe gazetari i Neës24, Osman Stafa, i cili i bëri thirrje MSH-së që të reagojë dhe të sigurojë medikamentet jetë shpëtuese për pacientët në nevojë.
“Ajo që na ka sjellë këtu është mungesa e medikamenteve. Aktualisht sot s’ka asnjë problematikë për MSH-në për të siguruar medikamentet. Nuk interesohet kush. Nuk reagon asnjë po nuk u ngrit zëri i qytetarëve. Nuk interesohet kush se çfarë po ndodh në sistemin shëndetësor në Shqipëri. Ministret si të vjetra dhe të rejat të mos merren me propagandat e ‘Facebook’! Ka mungesë medikamentet, si dhe janë prishur pajisjet. Nuk është kjo mjekësia që ne duam.
E dini çfarë ndodh në këtë vend? 50 mln lekë ka bërë tender ministria për mirëmbajtjen e makinave luksoze, e gjeni te prokuroria publike. Nuk mundet që spitalet shqiptare, fëmijët dhe të rritur të ngelen vetëm. MSH duhet të reagojë dhe të sigurojë medikamentet jetë shpëtuese për pacientët. Kam qenë vetë prezent se si i sigurojnë familjarët e pacientëve këto medikamente”, tha gazetari Stafa.
