Drejtuesi politik i LSI-së në qarkun e Beratit, Ardit Çela ka denoncuar thirrjen e një mitingu, në kushtet e pandemisë, nga kryetari i Bashkisë së Skraparit. Çela thotë se të gjithë punonjësve të Bashkisë kanë marrë një mesazh për të qenë pjesë e një mitingu gjatë ditës së nesërme.
Postimi i plotë i Çelës:
Drejtuesit e institucioneve në Skrapar janë zgjuar sot me një porosi të veçantë në telefonin e tyre. Kryetari i Bashkisë i njofton, porosit dhe urdhëron për tubim elektoral, dhe për një pjesëmarrje sa më masive nesër në 18:30, tek kinemaja në Çorovodë. Me porosi të veçantë i urdhëron të vijnë së bashku me stafet.
Ky është skandal i përsëritur. Është papërgjegjshmëri njerëzore. Është shpërdorim i hapur i detyrës. Akti normativ në fuqi ndalon qartazi tubimet elektorale, ndërkohë rilindja bën thirrje për tubim elektoral me pjesëmarrje sa me masive.
Ligji ndalon qartazi përdorimin dhe presionin ndaj administratës, ndërkohë rilindja u kërkon drejtorëve pjesëmarrjen sa më masive së bashku me stafet në takimet elektorale të rilindjes. Situata shëndetësore në Skrapar, Berat dhe gjithë Shqipërinë është dramatike dhe njerëzit po humbasim jetën përditë. Drejtuesit e Rilindjes në Skrapar thërrasin tubim elektoral, në pikun e pandemisë, duke i dënuar njerëzit me vdekje.
Ç’janë këta? A janë njerëz apo çfarë janë? Mirë frikë nga ligji nuk kanë, po nuk paskan mëshirë as për jetën e njerëzve.
I bëj thirrje Drejtorisë së Përgjithshme të Policisë së Shtetit, Drejtorisë së Policisë të Qarkut Berat, Komisionit Qëndror të Zgjedhjeve, të kryejnë detyrën, e jo vetëm të ndëshkojnë përgjegjësit , por duhet të parandalojnë të tilla organizime të cilat jo vetëm thyejnë ligjin por i çojnë njerëzit drejt ekspozimit ndaj virusit që ka marrë mijëra jetë.
/faxweb