Vendi ynë ndodhet në kulmin e një krize energjitike, por kjo nuk e ka penguar KESH (Korporata Elektroenergjitike Shqiptare) që të aktivizojë e të zbatojë një kontratë e cila rëndon xhepat e qytetarëve dhe sjell përfitime vetëm për subjekte private që përfitojnë prej saj dhe xhepave të shqiptarëve.

Bëhet fjalë për një kontratë abuzive dhe kriminale. Fax News ka siguruar dokumentin që tregon se KESH ka aktivizuar një kontratë për shkëmbimin e energjisë elektrike, e cila është në disfavor të kompanisë shtetërore shqiptare, në një kohë kur çmimi energjisë po shtrenjtohet në Shqipëri dhe në të gjithë Europën.

Kjo kontratë e cila është aktivizuar nga KESH dhe miratuar nga Autoriteti i Konkurrencëspërfshin shkëmbim energjie mes KESH dhe kompanisë NOA Energy, e cila këtë sasi do t’ia kthejë sërish Korporatës, brenda të njëjtës kohë. Pra, brenda të njëjtës ditë, por duke mos përcaktuar oraret.

Për shkëmbimin që bën me NOA Energy KESH merr edhe një interes të vogël, ndërsa privati në këto kohë të ‘çmendura’ të trgeut të energjisë në të gjithë Evropën merr fitime qindra mijëra euro brenda 24 orëve. Sipas kontratës së siguruar nga Fax News, KESH i jep energji kompanisë NOA Energy e cila e shet më pas për tia kthyer më pas këtë sasi në orare të tjera të ditës.

Zyrtarët e KESH-it ‘shfajësohen’ duke thënë se në momentet kur burimet hidrike janë të mëdha, që të mos derdhet uji prodhohet energji më shumë dhe ajo depozitohet diku jashtë. Ose në orare dhe lëvizje të ndryshme ditore dhe mujore dhe në fund bëhet një llogari vjetore.

Pikërisht te oraret qëndron dhe ‘kleçka’

Ka pasur orë piku të energjisë, mbrëmje, pra nga ora 17:00 deri në orën 21:00, që çmimi i energjisë ka shkuar deri në 400 euro megavati. Dhe kompania NOA Energy merr energji nga KESH dhe e shet. Dhe në rast se bëjmë një llogari të thjeshtë me një mijë megavat energji, një moment me një çmim tregu nga 300-400 euro për megavat, merr si të ardhura në bazë të çmimit në bursë nga 300 mijë-400 mijë euro. Këtë energji ia kthen KESH-it, në orët e para të mëngjesit. Pra, në orën 4 apo 5 të mëngjesit, kur çmimi në treg është diku më pak se 50 euro. Çka tregon qartazi se sa më i lartë të jetë çmimi i energjisë në orën e pikut, aq më shumë fiton kompania private që merr energji nga KESH-i. Dhe kjo energji i kthehet pas KESH-it me një përllogaritje të thjeshtë, me 1 mijë megavat shumëzim për 0.8 cent që merr KESH. Pra, vetëm 800 euro. Në një total, me një llogari të thjeshtë në rast se çmimi do të ishte 300 euro, kompania private do të fitonte 250 mijë euro në një ditë e në rast se do të ishte 400 euro për megavat kompania private do të fitonte deri në 350 mijë euro në ditë. Kjo ka ndodhur gjatë ditëve të shkuara.

Edhe pse kryeministri në një konferencë shtypi ka paralajmëruar krizë, KESH për shkak të një kontrate korruptive dhe abuzive, kur në skandal është përfshirë edhe Autoriteti i Konkurrencës, ka vazhduar t’i japë energji elektrike një subjekti privat, në një situatë qartazi monopoliste. Skema të tilla në KESH kanë ndodhur dhe më parë. Pra, nuk është vetëm kjo e sotmja e cila ka filluar prej marsit, në momentin që është miratuar nga Autoriteti i Konkurencës.

Po çfarë thuhet për këtë kontratë?

Kontrata është shpallur si zgjidhje për shkak të sasive të tepërta të energjisë që prodhon KESH dhe depozitim të tyre. Por në fakt, për këtë rast për shkak të kësaj krize, apo për shkak të rritjes së madhe të çmimit të energjisë dhe mungesës së saj në treg nuk kemi të bëjmë me një depozitim energjie, por kemi të bëjmë me një skemë të qartë alla ‘exchange’, ku shitjet dhe blerjet më vonë të megavatëve nuk i bën vetë KESH por një kompani private të cilës fitimet, sidomos në këtë moment përllogariten më së paku 250 mijë euro brenda një ditë.

Kryeministri Rama shpalli sot emergjencën energjetike në vend, por në fakt duket se kjo kriza buron nga Korporata Energjetike Shqiptare, me shumë mundësi e vetmja korporatë në botë që bën biznes e vetëdijshme që kompania tjetër do marrë gjithë ‘tortën e fitimit’, ndërsa vet pret me duart lart ‘goditjen’ që do e fundosë. Ndërkohë që dhe Autoriteti i Konkurrencës, një tjetër institucion plot me ‘profesionistë’, garanti ynë për të mos lënë askënd të na rrjepë me marrëveshje korruptive veçse sa ka dhënë shenjën ‘zjarr’ drejt shqiptarëve, për t’ua marrë dhe të fundit qindarkë, ndërsa në orët e mëngjesit shpërndahen në pak duar milionat e një dite me bereqet. Por ndoshta kryeministri ynë, nuk e di që tashmë e paska pasur gati dhe një dorë për zgjidhjen e krizës pa pasur nevojë të na traumatizojë me kufizime e rritje energjie. Le ta bëjë vetë shkëmbimin e energjisë. I bie pak a shumë 9 milionë euro në muaj fitim. Nuk janë dhe aq pak, për ne të paktën…

(E.H/Faxweb.al)

/faxweb

Subscribe kanalin tonë në Youtube për të mos humbur asnjë video të re