Ministri i Punëve të Jashtme thotë se kushti më i rëndësishëm është përfshirja e bullgarëve në Kushtetutën e Maqedonisë së Veriut, duke paralajmëruar se në atë vend ka propagandë antibullgare.

Ministri i Jashtëm bullgar, Nikollaj Milkov, deklaroi se Sofja është e gatshme për deeskalim në marrëdhëniet me Shkupin në kushte të caktuara.

Sipas tij, kushti më i rëndësishëm është përfshirja e bullgarëve në Kushtetutën e Maqedonisë së Veriut, duke paralajmëruar se në atë vend ka propagandë antibullgare.

Milkov tha për televizionin shtetëror bullgar (BTV) se në rastin e sekretarit të shoqatës bullgare “Car Borisi i Tretë”, i cili u rrah më 19 janar në Ohër, policia maqedonase po merr në pyetje aktivistët nga Bullgaria, në vend të sulmuesve të vërtetë, që është një problem i madh.

Tërheqja e ambasadorit nga Shkupi

“Ne jemi të gatshëm për de-përshkallëzimin e marrëdhënieve në kushte të caktuara. Nuk jemi të kënaqur me rikthimin në situatën e dhjetë ditëve më parë. Në veçanti, ne kërkojmë mbrojtjen e të drejtave të bullgarëve atje”, tha ai.

Milkov po ashtu thotë se nuk pajtohet me qëndrimin e presidentit maqedonas Steve Pendarovski se rasti i rrahjes së Pendikovit po përdoret për qëllime të brendshme politike në Bullgari.

Qeveria e Bullgarisë, në mandatin e saj teknik, javën e kaluar njoftoi se po tërhiqte ambasadorin nga Shkupi, Angelo Angelov, dhe njoftoi rishikimin e projekteve me Maqedoninë e Veriut.