Në protestën e tyre të katërt gjatë dy muajve të fundit, studentët e mjekësisë dënuan sërish atë që e quajnë, politikë detyruese të qeverisë që i diskriminon ata dhe i përze nga vendi . (efekte)
Përmes një peticioni të firmosur nga më shumë se një mijë studentë të mjekësisë së përgjithshme, të rinjtë shprehen të vendosur për të bojkotuar vitin e ri akademik.
MARIO RABIAJ
STUDENT I MJEKESISE
“Peticioni është firmosur nga 90% e studentëve të mjekësisë së përgjithëshme dhe do të shkojë në 100% pasi janë në rrethe, me sezon provimesh. ”
Ndryshe nga herët e tjera, protesta e studentëve u mbështet edhe nga mjekë e pedagogë.
Dr. GENTIAN CACO
KIRURG VASKULAR
“Një vendim absurd sepse nuk mund të detyrosh në këtë mënyrë askënd. Nuk është kjo mënyra e zgjidhjes së këtij problemi që na përket të gjithëve, duhet të pyesim se përse largohen jo vetëm mjekët por edhe profesionistët e tjerë, kjo vendimmarrje është e padrejtë, një goditje për sistemin arsimor dhe atë shëndetësor.”
ERVIN GOCI
PEDAGOG
“Një ndëshkim përmes një ligji që bëhet në një mënyrë që i përket sistemeve arbitrare dhe godet jo vetëm këtë grup studentësh, por godet të gjithë shoqërinë, shkencën dhe të gjitha profesionet.”
Mjekët e ardhshëm shprehen se çështja do të dorëzohet shumë shpejt në Gjykatën Kushtetuese, ndërsa kanë kërkuar edhe mbrojtje nga presidenti i vendit.
“Na mbroni z. Begaj, mos i lejoni të njollosen këto bluza të bardha.”
Gjatë dëgjesave në dy komisione të kuvendit, studentët e mjekësisë kanë deklaruar se nuk ka patur konsultime të mirëfillta me ta dhe as nuk gjendemi në kushte emergjence, ndërsa të rinjtë që largohen nga vendi nuk janë vetëm mjekë.
