Ish-ambasadori shqiptar në SHBA dhe nënkryetari i Partisë së Lirisë, Agim Nesho, është shprehur se takimi informal i liderëve të Ballkanit Perëndimor në Tiranë, është një shfaqje për të treguar protagonizmin e kryeministrit Edi Rama në skenën politike europiane.
Komentet Nesho i bëri përmes një interviste në Panorama TV, ku tha se kryeministri Edi Rama nuk ka hequr dorë nga projekti i “Ballkanit të Hapur”, por sipas tij, thjesht është tërhequr për momentin, nga frika e procesit ndaj tij për çështjen “McGonigal”.
“Është një shfaqje e dëshirës së Ramës për të treguar protagonizëm në skenën europiane. Ky ishte një takim i thjeshtë dhe dua të them kur filloi kjo iniciativë, u mor parasysh nga propaganda e Ramës. Mbaj mend në atë kohë u përhap në Shqipëri fjala sikur Rama ishte lideri i Ballkanit, i përzgjedhuri i Merkel. Kishin bërë një dokument dhe thoshin “në udhëheqësit demokratikë të zgjedhur në mënyrë lëgjitime”.
Këta vinin legjitimitetin e këtyre udhëheqësve, që në shumicën e rasteve, si Rama dhe Vuçiç, nuk njihen për demokraci, por për mos-respektimin e votës së lirë, ndërhyrjen e administratës publike në administrimin e zgjedhjeve. Lënia brenda një nate e kësaj gjëje, tregon se në çfarë kushtesh është. Procesi i Berlinit është një projekt afatgjatë, që në fund të fundit do të shikojë edhe meritokracitë e shteteve. Është një proces që ashtu si e ka thënë kancelarja Merkel, tregon dritën në fund të tunelit.
Ne e kemi thënë disa herë edhe më parë, që do të ishte e mirë në fillimet e tij që ta përdorte për presion për riaktivizimin e Procesit të Berlinit. Por në fakt nuk ishte kështu, pasi nervozizmi ndaj Europës, ndryshimet e sponsorizuara edhe nga Rusia… Në këtë mënyrë do të ishte një gjetje nëse Rama nuk do të shkonte kaq shumë me Ballkanin e Hapur. Shqipëria nuk ka hequr kufijtë akoma me Kosovën, por Ballkani i Hapur ishin aq largpamës sa të realizonin një hapsirë të përbashkët sa nuk do të thoshte gjë tjetër veçse një rikthim të Jugosllavisë.
Një vëzhgues i mirë e shikon që kishte një tension, por unë mendoj se çështja e paraqitjes së një vasali para Vuçiç… Vuçiç e rrëzoi qëndrimin parimor të Ramës. Kjo tregon që Rama nuk ka hequr dorë nga Ballkani i Hapur. Por është i detyruar në këto kohë për t’u tërhequr. Ajo që ka ndodhur tani me nënkryeministrin, me çështjet e ngjarjeve të rënda që tregojnë mos-funksionimin e shtetit ligjor, si rrahja masive në Fushë-Krujë. Ajo që ka ndodhur dhe këmbëngulja e Ramës për të zaptuar pronën publike në Durrës dhe ta vërë në shërbim të sheikëve arabë.
Rama këto lëshime dhe tërheqje i bën për arsye se në 23 shtator do të kemi hapjen e dosjeve të rëndësishme të McGonigal dhe nuk mund të shpëtojë askush nga ai korrupsion i madh. Kjo tregoi se shkalla e korrupsionit është jo vetëm e frikshme, por edhe e papranueshme. Kosova ka një rol të jashtëzakonshëm, ka mbajtur gjithmonë frymën patriotike të kombit, pasi ka vuajtur jo vetëm nga genocide serb”, është shprehur Nesho.
