Shkollat për vajza në të gjithë Afganistanin do të rihapen deri në fund të marsit, tha një udhëheqës i lartë taleban për Associated Press, duke ofruar për herë të parë një afat më të qartë për vajzat që të kthehen në arsim që kur grupi mori pushtetin në gusht.
Zabihullah Mujahid, një zëdhënës i qeverisë afgane dhe zëvendësministër i kulturës dhe informacionit, tha se ministria e arsimit do të hapë klasa për vajzat dhe gratë për Vitin e Ri afgan më 21 mars.
“Nuk jemi kundër arsimit”
Vajzat në pjesën më të madhe të Afganistanit nuk janë lejuar të kthehen në shkollë pas klasës së 7-të që kur talebanët morën pushtetin dhe përmbysja e kësaj ka qenë një nga kërkesat kryesore të aktivisteve për të drejtat e grave dhe komunitetit ndërkombëtar për muaj të tërë.
Arsimi për vajzat dhe gratë është një “çështje kapacitetesh”, tha Muxhahid. “Ne po mundohemi t’i zgjidhim këto probleme deri në vitin e ardhshëm”, që shkollat dhe fakultetet të hapen.
“Ne nuk jemi kundër arsimit”, shtoi ai.
“Në shumë krahina, klasat e larta” në shkollat e vajzave “janë të hapura, por në disa vende nuk janë të hapura. Ndër arsyet është kriza ekonomike,” tha ai.
