Nexhat Restelica është 54 vjeçar. Ai jeton në fshatin Kryshevc të Obiliqit, në këtë banesë të vogël, ku qëndron i vetëm prej mëse 10 vitesh.
Kohët e fundit, shëndeti i tij është përkeqësuar, ndërsa lista e barnave që duhet të marrë, nuk mbaron. Banesa e Nexhatit është pranë një prej ndotësve më të mëdhenj të ajrit në Kosovë, termocentralit ‘Kosova A’.
“Antibiotikë, këto janë vitamina për t’u forcuar, ky është prokulini (ilaç) që duhet ta përdor për syrin e djathtë. Të gjitha këto duhet t’i paguaj unë e kjo është më e keqja. Përkundër që jam i papunë, e dëshmoj me dokumente në ambulancë në Obiliq… sërish duhet të paguaj për të hyrë në kontroll.”-tregon 54 vjeçari për REL.
Prej 20 vitesh Restelica nuk ka një punë stable, mundohet të gjejë kohë pas kohe punë fizike. Shumë shtëpi në fshat janë braktisur. Disa kanë patur ‘fatin’ të lëvizin apo kanë marrë ‘riskun’ e braktisjes së banesave për një jetë më të mirë.
Dimri po afron tashmë dhe Nexhati tregon se ka frikë për shëndetin e tij, pasi siç shpjegon ai në dimër djegia e thëngjillit është shumë e madhe e kësisoj ndotja edhe më e rrezikshme.
“Çdo pikëpamje, jeta na vështirësohet prej termocentralit. Numri një është ndotja e ambientit… çdo bar e ka efektin pozitiv por edhe atë negativ. Në këtë kohë mund të ruhesh (nga ndotja), por kur fillon të fryjë veriu i dimrit, këtu nuk ke pse del nga tymi i qymyrit, nga pluhuri i oxhakëve.”-tregon 54 vjeçari.
Më poshtë, video e kronikës së Radio Evropa e Lirë