Forcat ruse sulmuan sot anijen turke “Orinda” ndërsa ajo ishte e ankoruar në portin e Izmail, Ukrainë, në rajonin e Odessa-s, pranë kufirit me Rumaninë.
Autoritetet lokale paralajmërojnë se situata është jashtëzakonisht kritike, pasi anija mund të “shpërthejë në çdo moment”.
Siç raportohet nga faqja e internetit turkiyetoday, anija në fjalë mbante afërsisht 4,000 ton gaz të lëngshëm nafte (LPG), gjë që shkaktoi një zjarr gjatë sulmit dhe kërkoi evakuimin e zonave përreth për arsye sigurie.
Drejtoria e Përgjithshme e Çështjeve Detare e Turqisë konfirmoi se të gjithë 16 anëtarët turq të ekuipazhit u evakuuan në mënyrë të sigurt nga anija. Asnjë nuk u lëndua dhe është transferuar në një vend të sigurt, sipas deklaratës.
Ekipet ukrainase të zjarrfikësve iu përgjigjën vendit të ngjarjes dhe autoritetet ukrainase thanë se një vlerësim i dëmeve do të kryhet sapo zjarri të jetë plotësisht nën kontroll. Zyrtarët turq shtuan se po e monitorojnë nga afër situatën dhe janë në kontakt me autoritetet përkatëse ukrainase.
Një fshat në zonë është evakuuar.
Në të njëjtën kohë, autoritetet rumune u vunë gjithashtu në gatishmëri dhe evakuuan fshatin Plaourou pasi flakët arritën një distancë prej afërsisht 500 metrash nga fshati.
Sipas transmetuesit rumun Digi24, midis 100 dhe 150 banorëve të Plaourou, të vendosur direkt përballë Ismail në Danub, u evakuuan si masë paraprake.
Kryebashkiaku i zonës, Tudor Cernega, tha se shërbimet e sigurisë po kryenin kontrolle shtëpi më shtëpi dhe po largonin kafshët për shkak të rrezikut të një shpërthimi serioz.