Presidenti i Republikës, Ilir Meta ka treguar historinë e Ylli Bodinakut, shqiptari i cili së bashku me familjen e tij hyri brenda rrethimit të ambasadës gjermane në vitet 90.
Meta thotë se ka takuar Bodinakun para pak ditësh dhe e ka pyetur si ka mundësi që kishte marrë me vete dhe fëmijën atë ditë. Ndërkohë Bodinaku i ishte përgjigjur duke i rrëfyer një histori në burgun e Spacit në lidhje me preshin shqiptar .
“Më kujtua një histori shumë interesante, që ka të bëjë me një person që nuk njihet shumë, por të gjithë e dinë që në 2 korrik një qytetar i Tiranës, Ylli Bodinaku, mori kamionin e tij foshnjën 3 muajsh, ca shokë e miq që ishin kundër sistemit dhe hyri brenda ambasadës gjermane duke i rënë me kamion murit, duke u bërë pararendës i rrëzimit të murit të ambasadave në Tiranë dhe ardhjes së demokracisë.
Këtë e takova para disa javësh rastësisht, nuk e dija që atëherë kishte marrë edhe foshnjën 3 muajsh, që tani është 30 vjeç. I them mirë vetë, po për foshnjën, si e mendove? Po mirë unë, tha, por si mund të rritej fëmija im në atë regjim.
Më tregoi një histori me Austrinë kur ishte në burg. ‘Na mbledhin një ditë tha në Spaç, dhe ngaqë na bënin presh tërë kohën dhe ishte momenti të bojkotonim ushqimin se nuk shtyhej dhe vjen një nga drejtuesit nga ministria e Brendshme dhe mbledh të burgosurit dhe thotë; para pak kohësh isha në Austri për vizitë dhe dolën me ambasadorin në Vjenë shëtitje dhe kur dolëm shohim gjitha ata njerëz po vraponin, ndonjë grevë?
Kur, pyeti ambasadori i thonë; kanë vrapuar austriakët se kishin ardhur maunet me presh nga Shqipëria dhe ngaqë e duan shumë dhe ka kërkesa për preshin e Shqipërisë, vrap i madh. Ndërsa, ju i thotë, këtu, nuk e kuptoni këtë të mirë që ju ofrojmë dhe ju japim çdo ditë. Si mundet të jetojë fëmija ime në atë regjim, më tha.’
E them këtë sepse diktaturat janë regjime që bazohen mbi gënjeshtrat për të manipuluar shoqërinë duke i servirur gënjeshtrën si të vërtetë, ndërsa te pjesa tjetër përmes represionit” tha Meta.
(E.H/Faxweb.al)
/faxweb
