Policia e Shkodrës ka nisur inspektimin në liqenin e Komanit për të ndaluar lundrimin e mjeteve që nuk përmbushin kriteret dhe rrezikojnë jetën e turistëve.
Bëhet me dije se janë bllokuar 5 varka të ndërtuara në mënyrë artizanale, si dhe janë gjobitur me 10 mijë lekë drejtuesit e tyre.
Policia ka bllokuar dhe një tjetër mjet lundrues që nuk kishte dokumentacionin e nevojshëm.
“Gjithashtu, u bë bllokimi i një mjeti lundrues traget në pronësi të shtetasit Gj. G., pasi gjatë verifikimeve të kryera nga specialistët e Seksionit për Hetimin e Krimeve Ekonomiko-Financiare të DVP Shkodër, në kalatën e liqenit të Komanit, është konstatuar se ky traget ishte i paregjistruar në organet tatimore, kishte punonjës te paregjistruar, si dhe mungonte leja e drejtimit për guidimin e tij’, thuhet në njoftim.
Policia ka nisur këtë sezon veror kontrolle të vazhdueshme në vijën bregdetare për të evituar tragjeditë në plazhet shqiptare.
