Mblidhet sot Konventa e Lëvizjes Socialiste për Integrim e Tiranës. Takimi do të zhvillohet në orën 11:00 në ambientet e Qendrës Kulturore, pranë Kompleksit të Katedrales Ortodokse, njoftoi LSI. Qëllimi i mbledhjes i kësaj Konvente në fillim të vitit, u dha dje nga Nënkryetari i LSI, Petrit Vasili, gjatë një deklarate:

“Shqiptarët në 2020 nuk mund të humbasin më asnjë ditë më shumë për të rifituar të ardhmen e grabitur nga qeveria, për të rikthyer shpresën, për ta parë perspektivën e tyre në Shqipëri dhe jo duke braktisur Shqipërinë, dhe për t’u integruar në Europë aty ku shqiptarët meritojnë të jenë por për shkak të qeverisë ndodhen jashtë saj.

Ndaj viti 2020 është vendosja e drejtësisë së popullit të grabitur e të plaçkitur dhe për largimin e një qeverisje që është shkaktare e ditëve të errëta e të zymta që ata po kalojnë e që I përjetuan të tilla edhe gjatë festave.

Lëvizja Socialiste për Integrim do t’u japë jehonë këtyre shqetësimeve kritike të shqiptarëve dhe rrugës së qartë të zgjidhjes së tyre në Konventën e LSI-së së Tiranës. 2020 është viti ku Shqipëria të kthehet shtëpia e shqiptarëve.”

Subscribe kanalin tonë në Youtube për të mos humbur asnjë video të re