Dy persona të shpallur në kërkim për kultivim droge janë arrestuar nga policia e Elbasanit.
Mësohet se në kuadër të operacionit policor të koduar “Krasta” u vunë në pranga shtetasit A. M., 36 vjeç, banues në Krujë dhe F. D., 23 vjeç, banues në Tiranë.
Për këta dy shtetas , Gjykata e Shkallës së Parë e Juridiksionit të Përgjithshëm Elbasan kishte caktuar masë e sigurisë “Arrest me burg” për veprën penale “Kultivimi i bimëve narkotike”.
Në territorin e fshatit Seltë, njësia administrative Zavalinë, në kuadër të operacionit policor të koduar “Krasta”, përgjatë dy fazave të tij, zhvilluar në muajin qershor, u gjetën në pronë publike, rreth 250 bimë narkotike kanabis, në kultivimin e të cilave dyshohet se janë bashkëpunëtorë shtetasit A. M. dhe F. D.
Gjithashtu, për këto raste, në kuadër të dy fazave janë vënë në pranga 2 inspektorë pyjesh dhe kryetari i fshatit, për shpërdorim detyre, si edhe 2 shtetas të tjerë, për kultivimin e bimëve narkotike.