Bazuar në videoimazhet e publikuara nga televizioni zyrtar algjerian, Abdelmadjid Tebboune ka dhënë një intervistë për shtypin lokal të vendit.
I pyetur në lidhje me kthimin e ambasadorit algjerian në Paris, Tebboune u përgjigj me këto fjalë: “Kthimi (i ambasadorit) është i kushtëzuar me respektin e plotë për sovranitetin, institucionet dhe fuqinë e Algjerisë.”
“Pala franceze duhet të harrojë që Algjeria ishte dikur një koloni. Algjeria është e fuqishme me ushtrinë dhe popullin e saj krenar që i nënshtrohen vetëm Allahut”, shtoi ai.
Tebboune vuri në pah se shifra e dhënë për numrin e algjerianëve që planifikohet të dëbohen nga Franca, gjithashtu nuk është e saktë dhe se ata janë vetëm 94 persona.
Sipas tij, Algjeria ka pranuar dëbimin e 21 qytetarëve dhe ka refuzuar prerazi ekstradimin e 16 prej tyre me arsyetimin se ata kanë lidhje me terrorizmin, ndërkohë që situata në lidhje me të tjerët nuk është përmbyllur ende.
Duke risjellë në kujtesë se ata i mbeten besnikë Marrëveshjes së Emigracionit Preferencial të nënshkruar me Francën në vitin 1968, Presidenti Tebboune theksoi se Parisi duhet të sillet në një mënyrë të veçantë me vendin e tij.
Javën e kaluar, Ministria algjeriane e Punëve të Jashtme thirri ambasadorin francez në Algjer dhe i komunikoi atij refuzimin e vendimit të njëanshëm të Parisit për të përgjysmuar numrin e vizave të lëshuara për algjerianët. Më vonë u pretendua se autoritetet algjeriane refuzuan gjithashtu të pranonin 7 mijë njerëz që do të dëboheshin nga Franca me vendime gjyqësore.
Nga ana tjetër, grupi lokal i kompanive në Algjeri filloi një përpjekje për të ndërprerë marrëdhëniet tregtare të import-eksportit me 500 kompani franceze.