Një gjykatë spanjolle ka hedhur poshtë një hetim tatimor ndaj yllit kolumbian të popit Shakira pasi prokurorët vendosën të mos ngrinin akuza.
Prokurorët pretenduan se Shakira përdori një rrjet ndërkombëtar korporatash për të shmangur pagesën e 6.6 milionë eurove në taksa spanjolle në vitin 2018.
Megjithatë, një gjyqtar vendosi të pushojë çështjen pasi prokurorët thanë se nuk kishte prova të mjaftueshme për të ngritur akuza.
Gjykatësi tha se nuk kishte asnjë tregues se ylli i popit ishte përpjekur qëllimisht të fshihte informacione ose dokumente nga autoritetet në mënyrë që të shmangte taksat.
Shakira ra dakord për një marrëveshje vitin e kaluar për të shmangur një gjyq në Barcelonë mbi akuzat se ajo nuk i kishte paguar Spanjës 14.5 milionë euro tatimin mbi të ardhurat nga 2012 deri në 2014.
Si pjesë e marrëveshjes, Shakira pranoi akuzën dhe ra dakord të paguante 50 për qind të borxhit të supozuar, që është rreth 7.3 milionë euro. Ajo gjithashtu pranoi të paguante një gjobë prej 438,000 euro për të shmangur një dënim me tre vjet burg.
Ajo u kërcënua gjithashtu me një hetim të dytë për shkak të mashtrimit të dyshuar mbi të ardhurat dhe tatimin në pronë në vitin 2018.
Duke folur për Elle Magazine në vitin 2022, këngëtarja akuzoi autoritetet spanjolle tatimore për drejtimin e një “fushate të gabuar mediatike” kundër saj.
Shakira ishte në një lidhje me ish-futbollistin e Barcelonës, Gerard Pique, i cili gjithashtu u akuzua për shmangie të taksave miliona.
Çifti ka dy fëmijë, por ata u ndanë vitin e kaluar dhe këngëtarja u largua nga Barcelona dhe aktualisht jeton në Miami.
