Partia Socialiste ka kërkuar përjashtimin e Gazmend Bardhit dhe Flamur Nokës, pas tensioneve të shkaktuara sot (17 janar) në Komisionin e Medias dhe gjatë seancës së parë të sesionit të ri parlamentar më 15 janar.
Deputetët e “Rithemelimit” debatuan ashpër me kryetaren e komisionit të Medias, Flutura Açka, të cilës i “shkulën” mikrofonin për t’i ndërprerë fjalën dhe me deputetet e grupimit të Bashës.
Ndërkohë sesioni i ri parlamentar më 15 janar nisi aty ku mbaroi i vjetri, me kaos dhe tension të krijuar nga deputetët që mbështesin Gazmend Bardhin dhe Sali Berishën.
Për shkak të kaosit, presidenti i Republikës, Bajram Begaj u detyrua të anulonte fjalim në Kuvend, dhe ta mbante atë në Presidencë.
Në seancën e parë të sesionit të ri ku ishin të pranishëm edhe ambasadorët e huaj në vend, u miratuan ndryshimet në qeveri dhe u betua deputeti Plarent Ndreca, i cili mori mandatin e Arben Ahmetaj që ndodhet në arrati.
