Grupi Parlamentar i Partisë Socialiste ka kërkuar marrjen e masës disiplinore përjashtim për 6 deputetë të opozitës, përfshirë edhe ish-kryeminstrin Sali Berisha.

Në kërkesën e deputetëve socialistë kërkohet masë për deputetët Flamur Noka, Elda Hoti, Albana Vokshi, Gazment Bardhi, Edi Paloka dhe Sali Berisha.

Kjo kërkesë për përjashtim vjen pas seancës së të hënës së 4 Dhjetorit, ndërsa opozita bllokoi zhvillimin e punimeve në Kuvend, përmes kaosit të krijuar me flakadanë dhe zjarr.

“Kaosi i krijuar nga deputetë të caktuar të opozitës në seancën plenare të datës 04.12.2023. pengoi zhvillimin normal të saj duke mos lejuar që deputetë të caktuar të Grupit Parlamentar të Partisë Socialiste të mbanin fjalën e tyre, për shkak të situatës së krijuar. Këto sjellje të Kuvendit dhe që në nisje të seancës deputetë të opozitës bllokuan foltoren duke vendosur karriget si barrikadë para saj”, thuhet në kërkesën drejt kryetares së Kuvendit, Lindita Nikolla.

Më tej shpjegohen arsyet për secilin deputet, se përse kërkohet përjashtimi i tyre.

“Deputeti Flamur Noka ndezi disa flakadanë duke shkaktuar kaos dhe rrëmujë në sallë. Njërin prej flakadanëve deputeti Noka e hodhi në drejtim të Kryetares së Kuvendit. Edhe pse drejtuesja e seancës mori masë disiplinore ndaj deputetit, ai vijoi përsëri të cënojë mbarëvajtjen e seancës plenare. Situata agravoi edhe më tej në momentin kur deputeti Noka i vuri flakën disa herë letrave dhe i vendosi tek karriget që ishin vendosur për të bllokuar foltoren, duke rrezikuar kështu jetën e deputetëve dhe të stafit në sallë.

Deputetet Elda Hoti dhe Albana Vokshi i dhanë disa herë deputetit Flamur Noka flakadanë. Gjithashtu deputetja Elda Hoti e ndihmuar edhe nga deputetja Vokshi ndezën disa flakadanë ku disa prej tyre i vendosën poshtë karrigeve mbi foltore.

Deputeti Gazmend Bardhi pengoi zhvillimin e rregullt të seancës plenare duke shkaktuar rrëmujë në sallë dhe përdori fjalë fyese ndaj deputetëve të Partisë Socialiste gjatë fjalës së tyre. Gjithashtu deputeti Bardhi tentoi t’i merrte kartën nga pajisja elektronike deputetit Petro Koçi gjatë kohës që po mbante fjalën. Gjithashtu pranë deputetit Koçi u afrua edhe deputeti Edi Paloka i cili tentoi ta godiste.

Deputeti Sali Berisha pengoi zhvillimin e rregullt të seancës plenare duke zaptuar foltoren e Kuvendit, duke shkaktuar kaos në sallë, fyer deputetët dhe drejtuesen e seancës, sjellje këto në kundërshtim të plotë me Rregulloren e Kuvendit të Republikës së Shqipërisë.

Nisur nga këto situata të krijuara në seancën plenare të datës 04.12.2023, në mbështetje të nenit 63, pika 1 gërma d), dhe nenit 65/1 të Rregullores së Kuvendit të Republikës së Shqipërisë, në mbështetje të nenit 3, gërma dh) dhe ë), nenin 8. pika 2 gërma b) dhe nenin 33 të Kodit të Sjelljes së Deputetit të Kuvendit të Republikës së Shqipërisë, paraqesim kërkesën si më poshtë:

Marrjen e masës disiplinore ndaj deputetëve, Flamur Noka, Elda Hoti, Albana Vokshi Gazmend Bardhi, Edi Paloka dhe Sali Berisha sipas Rregullores së Kuvendit të Republikës së Shqipërisë.

Mbledhjen e Sekretariatit për Procedurat, Votimet dhe Etikën për vlerësimin e masës disiplinore.”, përfundon kërkesa.

“”

Subscribe kanalin tonë në Youtube për të mos humbur asnjë video të re