Tensioni Rusi – Ukrainë, tjetër paralajmërim amerikan

2021-12-06-UKRAINE-CRISIS-DEFENCE.webp.webp

Ndajeni këtë artikull me të tjerë duke klikuar ikonat më poshtë

Presidenti i SHBA Joe Biden ia ka bërë të qartë presidentit ukrainas Volodymyr Zelensky se Shtetet e Bashkuara dhe aleatët dhe partnerët e tyre do të përgjigjen me vendosmëri nëse Rusia sulmon më tej Ukrainën, tha Shtëpia e Bardhë në një deklaratë.

“Udhëheqësit shprehën mbështetje për përpjekjet diplomatike, duke filluar javën e ardhshme me një dialog dypalësh SHBA-Rusi mbi stabilitetin strategjik, më pas përmes Këshillit NATO-Rusi dhe Organizatës për Siguri dhe Bashkëpunim në Evropë. Presidenti Biden theksoi përkushtimin e Shteteve të Bashkuara dhe aleatëve dhe partnerëve të saj ndaj parimit ‘asgjë për ty pa ty’. Ai ripohoi angazhimin e Shteteve të Bashkuara ndaj sovranitetit dhe integritetit territorial të Ukrainës”, tha zëdhënësja e Shtëpisë së Bardhë Jen Psaki.

Biden shprehu gjithashtu mbështetje për masat e ndërtimit të besimit për të ulur tensionet në Donbas dhe diplomacinë aktive për të përmirësuar zbatimin e marrëveshjes së Minskut, në mbështetje të formatit të Normandisë.

Presidenti ukrainas Zelensky tha se kishte diskutuar me Biden veprimet e përbashkëta për të ruajtur paqen në Evropë dhe për të parandaluar përshkallëzimin e mëtejshëm, transmeton Reuters.

“Biseda e parë ndërkombëtare e këtij viti me Biden dëshmon natyrën e veçantë të marrëdhënies sonë”, shkroi Zelenski në Twitter.

Ai njoftoi se ata diskutuan veprimet e përbashkëta të Ukrainës, Shteteve të Bashkuara dhe partnerëve në ruajtjen e paqes në Evropë, parandalimin e përshkallëzimit të mëtejshëm, reformat dhe deoligarkizimin.

“Ne vlerësojmë mbështetjen e palëkundur për Ukrainën”, shkroi Zelensky.

Ndajeni këtë artikull me të tjerë duke klikuar ikonat më poshtë