Që prej orëve të para të mëngjesit, situata përpara Ministrisë së Brendshme, në zonën pedonale përballë ka qenë e tensionuar, pas shembjes së teatrit.
Shumë qytetarë, aktivistë të Aleancës për Mbrojtjen e Teatrit, kanë tentuar të thyejnë sërish kordonin policor, ndërsa brohorasin “ Poshtë diktatura”, “liri demokraci” etj. Mes tyre nuk kanë munguar përplasjet fizike me efektivët e policisë.
Kordonët e Policisë mbajnë të rrethuar godinën, ndërsa qytetarët përplasen me forcat e rendit për të çarë rrethimin dhe vijuar lëvizjen drejt godinës së Teatrit, një pjesë e madhe e së cilës është rrëzuar tashmë.
Situata është agravuar, ndërsa janë urdhëruar forcat e Ndërhyrjes së Shpejtë të ndërhyjnë në operacion. Burimet sqarojnë se 500 trupa të FNSH po bëjnë gati ndërhyrjen për të pastruar zonën e Teatrit nga qytetarët, si dhe për të bllokuar të gjitha rrugët e hyrjes dhe daljes nga zona.
