50 vjet burg ka dhënë gjykata italiane për pesë anëtarë të një bande kriminale të trafikut të kokainës në Genova. Mes të dënuarëve rezulton edhe Artur Mahmutaj, ish-zëvendës drejtor në Hekurudhat e Durrësit. Droga që u kap në portin e Genovas në nëntor të 2017, origjinën e kishte nga Amerika Jugore, ndërsa kishte për destinacion Italinë e Veriut, si dhe tregjet franceze. Nëse kokaina do të hidhej në treg, do të kapte një vlerë prej 3 milionë eurosh.
Prokurori i çështjes Federico Manotti tha se në vendngjarje janë gjetur mbi 77 kilogramë drogë e llojit kokainë. Gjyqtari italian Filippo Pisaturo dha 12 vite burg për Massimo Roccan , 9 vite e 8 muaj burg për Roberto Piano 12 vjet burg për Nik Duatin, 6 vjet burg për Artur Mahmutajn dhe 9 vjet e 4 muaj burgim për Carmelo Rao.
Sipas hetuesve rrjeti i shpërndarjes së drogës drejtohej nga shqiptarët. Rao kishte rolin e bashkëpunëtorit ndërsa Rocca dhe Piano kishin detyra me rëndësi për bandën në portin e Genovas ku shqiptarët kishin marrë “kontrollin”.