Pas tërmetit shkatërrimtar në Durrës dhe në Thumanë, Presidenti i Republikës, Ilir Meta, ka anuluar të gjithë pritjet e programuara me rastin e Ditës së Flamurit dhe të Festës së Pavarësisë. Kujtojmë se qeveria vendosi të shpallë të enjten si ditë zie kombëtare në nder të viktimave të tërmetit.
“Nisur nga situata e rëndë e fatkeqësisë natyrore që goditi vendin tonë dhe që për fat të keq shkaktoi humbje jetësh të qytetarëve, plagosje dhe dëme të jashtëzakonshme materiale si dhe nga rëndësia prioritare e përqendrimit të të gjitha forcave e energjive për të përballuar pasojat katastrofike të kësaj tragjedie, Presidenti i Republikës së Shqipërisë Sh.T.Z. Ilir Meta ka vendosur të anullojë Pritjen Shtetërore organizuar me rastin e ditës së Flamurit dhe Festës së Pavarësisë planifikuar për në datën 28 nëntor 2019 në orën 19:00, në Pallatin e Brigadave, Tiranë”-thuhet në reagimin e Presidencës.
