Tetë punonjës të policisë në Shqipëri janë prekur nga koronavirusi. Drejtori i Përgjithshëm i Policisë, Ardi Veliu në një lidhje live për emisionin ”Kjo Javë” të Nisida Tufës në Neës24 ka bërë me dije situatën e policëve të prekur nga COVID-19 në Shqipëri.
Veliu thotë se 3 prej tyre tashmë janë shëruar, 5 të tjerët janë në spital kurse ata që kanë pasur kontakte të afërta janë vetëkarantinuar.
“Është e vërtetë që janë 8 punonjës policie të prekur drejtpërdrejt. 3 janë shëruar, kanë kaluar gjendjen në spital dhe kanë dalë janë në banesat e tyre. Pjesa tjetër të shtruar në spital. Janë vetëkarantinuar ata që kanë pasur kontakte. Kemi dhënë porositë e herëpashershme”, tha Veliu.
Drejtori i policisë tha se shumica e gjobave janë për qytetarët që kanë shkelur fashat e orareve duke dalë jashtë apo pa autorizim që janë 4 mijë e 363 gjoba në më shumë se një muaj.
Po ashtu 1 mijë e 624 gjoba për ata që kanë qarkulluar me automjete, 237 për ata që kanë hapur lokale apo bare, 10 për thyerje të urgjencave mjekësore.
